પાકિસ્તાન અધિકૃત કાશ્મીર (PoK)માં તાજેતરના દિવસોમાં વ્યાપક વિરોધ જોવા મળી રહ્યો છે. પાકિસ્તાન સરકાર દ્વારા વિરોધને દબાવવાના તમામ પ્રયાસો બાદ હવે એક નવું સંકટ ઊભું થયું છે. પીઓકેના કથિત વડાપ્રધાન ચૌધરી અનવારુલ હકની કેબિનેટના ત્રણ વરિષ્ઠ મંત્રીઓએ રાજીનામું આપી દીધું છે. આ મંત્રીઓએ અનવારુલ હક પર પીઓકેના રહેવાસીઓ અને પાકિસ્તાનમાં રહેતા કાશ્મીરી શરણાર્થીઓના બંધારણીય અને રાજકીય અધિકારોનું રક્ષણ કરવામાં નિષ્ફળ જવાનો આરોપ લગાવ્યો છે. ત્રણ મંત્રીઓના રાજીનામા પાકિસ્તાનની શાહબાઝ શરીફ સરકાર માટે નવો પડકાર બની શકે છે.
પાકિસ્તાની વેબસાઈટ ધ એક્સપ્રેસ ટ્રિબ્યુન અનુસાર, પીઓકેના માહિતી મંત્રી પીર મઝહર સઈદે સૌથી પહેલા રાજીનામું આપ્યું હતું. ત્યારબાદ નાણા મંત્રી અબ્દુલ મજીદ ખાન, ખાદ્ય મંત્રી ચૌધરી અકબર ઈબ્રાહિમ અને અસીમ શરીફ બટ્ટે શનિવારે પોતાના રાજીનામાની જાહેરાત કરી હતી. તેમના રાજીનામા બાદ જારી કરાયેલા એક નિવેદનમાં આ નેતાઓએ જણાવ્યું હતું કે હકની સરકારે પીઓકેના લોકો અને પાકિસ્તાનમાં રહેતા 25 લાખ કાશ્મીરી શરણાર્થીઓના મુદ્દાઓને ઉકેલવામાં નિષ્ફળતાને કારણે નૈતિક અને રાજકીય કાયદેસરતા ગુમાવી દીધી છે.
કાશ્મીરીઓના અધિકારો સુરક્ષિત નથી
રાજીનામું આપનારા મંત્રીઓએ કહ્યું કે અનવારુલ હકને સત્તામાં રહેવાનો કોઈ અધિકાર નથી. તેમણે તાજેતરની અશાંતિ અંગે સરકારના સંચાલનની પણ આકરી ટીકા કરી હતી. રાજીનામું આપ્યા બાદ અબ્દુલ મજીદ ખાને કહ્યું કે તેઓ કાશ્મીરી શરણાર્થીઓના અધિકારો પ્રત્યે તેમની પ્રતિબદ્ધતાને કારણે સરકાર છોડી રહ્યા છે.
મજીદે જમ્મુ અને કાશ્મીર જોઈન્ટ એક્શન કમિટી (JAAC)ની ટીકા કરતા કહ્યું કે તેણે વિધાનસભામાં 12 આરક્ષિત શરણાર્થીઓની બેઠકો નાબૂદ કરવાની વિભાજનકારી અને તકવાદી માંગ કરી છે. તેમણે કહ્યું કે JAAC અને ફેડરલ પ્રતિનિધિઓ વચ્ચેના કરારમાં કાયદેસરતા અને વ્યાપક સર્વસંમતિનો અભાવ છે.
પાક વડા પ્રધાનને પત્ર
ચૌધરી અકબર ઈબ્રાહિમે કહ્યું કે શરણાર્થીઓ માત્ર રાજકીય સંખ્યા નથી. તેઓ એવા લોકો છે જેમણે દાયકાઓથી વિસ્થાપન સહન કર્યું છે. સરકારે તેમના પ્રત્યે સંવેદનશીલતા દાખવવાની જરૂર છે. પીઓકે સરકારમાંથી રાજીનામું આપનારા મંત્રીઓએ પાકિસ્તાનના રાષ્ટ્રપતિ આસિફ અલી ઝરદારી, વડાપ્રધાન શાહબાઝ શરીફ અને આર્મી ચીફ જનરલ અસીમ મુનીરને હસ્તક્ષેપ કરવા વિનંતી કરી હતી.
