ભારતે અમેરિકી રાષ્ટ્રપતિ ડોનાલ્ડ ટ્રમ્પના દાવાને ફગાવી દીધો છે કે વડા પ્રધાન નરેન્દ્ર મોદીએ તેમને ખાતરી આપી હતી કે ભારત રશિયા પાસેથી ક્રૂડ ઓઈલ ખરીદવાનું બંધ કરશે. વિદેશ મંત્રાલયના પ્રવક્તા રણધીર જયસ્વાલે ગુરુવારે સ્પષ્ટતા કરી હતી કે તેઓ વડાપ્રધાન મોદી અને રાષ્ટ્રપતિ ટ્રમ્પ વચ્ચે તાજેતરની કોઈપણ વાતચીતથી વાકેફ નથી. તેમણે કહ્યું કે, મને ગઈ કાલે બંને નેતાઓ વચ્ચે કોઈ ફોન કૉલ કે વાતચીતની કોઈ જાણકારી નથી. ટ્રમ્પે વોશિંગ્ટનમાં પત્રકારોને કહ્યું હતું કે ભારતે રશિયા પાસેથી તેલ ખરીદવા પર રોક લગાવવાની પ્રક્રિયા શરૂ કરી દીધી છે.

ડોનાલ્ડ ટ્રમ્પે શું કહ્યું?

ટ્રમ્પે પત્રકારોની સામે દાવો કર્યો, “વડાપ્રધાન મોદીએ મને આશ્વાસન આપ્યું છે કે રશિયા પાસેથી તેલ ખરીદવાનું બંધ કરી દેવામાં આવશે. આ તરત ન થઈ શકે; તેમાં થોડો સમય લાગશે, પરંતુ પ્રક્રિયા ટૂંક સમયમાં પૂરી થઈ જશે.” ટ્રમ્પે એમ પણ કહ્યું કે તેમનો ઉદ્દેશ્ય યુક્રેનમાં યુદ્ધ સમાપ્ત કરવા માટે રશિયન રાષ્ટ્રપતિ વ્લાદિમીર પુતિન પર આર્થિક દબાણ લાવવાનો છે. “અમે ઇચ્છીએ છીએ કે પુતિન આ યુદ્ધ બંધ કરે અને યુક્રેનિયનો અને રશિયનોને મારવાનું બંધ કરે,” તેમણે કહ્યું. આ યુદ્ધ એક અઠવાડિયામાં સમાપ્ત થવું જોઈતું હતું, પરંતુ તે હવે તેના ચોથા વર્ષમાં પ્રવેશી ચૂક્યું છે.

“અમારી નીતિ રાષ્ટ્રીય હિતો દ્વારા સંચાલિત છે”

ટ્રમ્પના દાવા બાદ જયસ્વાલે ભારતની ઉર્જા નીતિની સ્પષ્ટતા કરતા કહ્યું કે, ભારતનું ધ્યાન હંમેશા તેના ગ્રાહકોના હિતોનું રક્ષણ અને સ્થિર ઉર્જા કિંમતો જાળવવા પર રહ્યું છે. તેમણે કહ્યું, “ભારત તેલ અને ગેસનો મોટો આયાતકાર દેશ છે. અમારી નીતિ રાષ્ટ્રીય હિતોને આધારે ચાલે છે. અસ્થિર વૈશ્વિક ઉર્જા પરિદ્રશ્યમાં ભારતીય ગ્રાહકોને સસ્તું અને સુરક્ષિત ઊર્જા પુરવઠો સુનિશ્ચિત કરવાની અમારી પ્રાથમિકતા છે.” તેમણે વધુમાં જણાવ્યું હતું કે ભારત તેની ઊર્જા ખરીદીને વિસ્તારવા અને વિવિધ સ્ત્રોતોમાંથી આયાત વધારવા માટે કામ કરી રહ્યું છે.

ટ્રમ્પે ભારત પર 25 ટકા વધારાની ટેરિફ લાદી છે

ઉલ્લેખનીય છે કે રશિયા પાસેથી તેલ ખરીદવાના મુદ્દે ભારત અને અમેરિકા વચ્ચે તણાવના અહેવાલો છે. અમેરિકાનું માનવું છે કે ભારત દ્વારા રશિયન તેલની ખરીદી યુક્રેન યુદ્ધ માટે પુતિનને આર્થિક મદદ કરી રહી છે. ટ્રમ્પ વહીવટીતંત્રે તાજેતરમાં રશિયા પાસેથી તેલની ખરીદી પર વધારાની 25% ડ્યુટી સહિત ભારતથી આયાત થતા માલ પરની ટેરિફ બમણી કરીને 50% કરી છે. ભારતે આ પગલાને “અયોગ્ય, અન્યાયી અને અવ્યવહારુ” ગણાવ્યું છે.

LEAVE A REPLY

Please enter your comment!
Please enter your name here