રાજસ્થાનની રાજધાની જયપુરના ચાંદપોલ સર્કલ વિસ્તારમાં રવિવારે જ્યારે એક દરગાહની છતના નિર્માણને લઈને બે સમુદાયના રાજકીય પ્રતિનિધિઓ સામસામે આવી ગયા ત્યારે ભારે તણાવ સર્જાયો હતો. હવામહેલના ધારાસભ્ય બાલમુકુંદ આચાર્યએ બાંધકામને લેન્ડ જેહાદ ગણાવ્યા બાદ સ્થળ પર ભારે સૂત્રોચ્ચાર અને હોબાળો થયો હતો. સ્થિતિ વણસતી જોઈને ભારે પોલીસ બંદોબસ્ત ગોઠવી દેવામાં આવ્યો હતો.
વિવાદ ત્યારે શરૂ થયો જ્યારે ધારાસભ્ય બાલમુકુંદ આચાર્ય તેમના કામદારો સાથે બાંધકામ સ્થળ પર પહોંચ્યા અને કામ અટકાવ્યું. તેમણે આક્ષેપ કર્યો હતો કે સરકારી શાકભાજી માર્કેટ સંકુલમાં સ્થિત 400 યાર્ડમાં 4×4 ફૂટના જૂના માળખાને ગેરકાયદેસર રીતે વિસ્તૃત કરવાનો પ્રયાસ કરવામાં આવી રહ્યો છે. તેને ‘લેન્ડ જેહાદ’ ગણાવતા ધારાસભ્યએ કહ્યું કે અતિક્રમણ કોઈપણ સંજોગોમાં સહન કરવામાં આવશે નહીં.
હંગામાની માહિતી મળતા જ સ્થાનિક ધારાસભ્ય અમીન કાગ્ગી પણ તેમના સમર્થકો સાથે ઘટનાસ્થળે પહોંચી ગયા હતા. તેમણે બાલમુકુંદ આચાર્યના આરોપોને સંપૂર્ણપણે ફગાવી દીધા અને કહ્યું કે બાંધકામ સંપૂર્ણપણે કાયદેસર છે.
