આજે સ્ટોક માર્કેટ: ડોનાલ્ડ ટ્રમ્પ આજે અમેરિકાનું રાષ્ટ્રપતિ પદ સંભાળવા જઈ રહ્યા છે. જેના કારણે શેરબજારમાં આકર્ષક ઉછાળો જોવા મળ્યો છે. બેન્કિંગ શેરોમાં ઉછાળાને કારણે સેન્સેક્સ 646.96 પોઈન્ટ ઉછળ્યો છે. જ્યારે નિફ્ટી 150થી વધુ પોઈન્ટ વધીને 23376.50 પર પહોંચ્યો હતો.
સેન્સેક્સ પેકમાં સમાવિષ્ટ કોટક બેન્ક આજે 9 ટકાથી વધુ વધ્યો હતો. બજાજ ફાઇનાન્સ 3.19 ટકા, NTPC 2.79 ટકા, SBI 2.44 ટકા વધીને ટ્રેડ કરી રહ્યું છે. HDFC બેંકમાં પણ વોલ્યુમ વધ્યું છે. રોકાણકારોની મૂડીમાં રૂ. 3 લાખ કરોડનો વધારો થયો છે. જ્યારે આઈટી શેર્સમાં સાવચેતીભર્યું વલણ જોવા મળ્યું હતું. TCS 0.74 ટકા, ટેક મહિન્દ્રા 0.23 ટકા અને ઇન્ફોસિસ 0.15 ટકા ડાઉન ટ્રેડ થઈ રહ્યો હતો.
માર્કેટ બ્રેડ્થ સકારાત્મક
BSE પર ટ્રેડ થયેલા કુલ 4042 શેરોમાંથી 2307 સુધારાની તરફેણમાં અને 1548 ઘટાડા તરફેણમાં ટ્રેડ થઈ રહ્યા છે, શેરબજારમાં સાર્વત્રિક ખરીદી છે. 283 શેરમાં અપર સર્કિટ લાગી. જ્યારે 99 શેર વર્ષની ટોચે પહોંચ્યા છે. જે દર્શાવે છે કે માર્કેટબ્રેડ્થ પોઝિટિવ છે. નાણાકીય વર્ષ 2024-25 ના ત્રીજા ત્રિમાસિક ગાળા માટે મોટે ભાગે હકારાત્મક પરિણામો જાહેર કરવામાં આવી રહ્યા છે. અમેરિકામાં પણ મોંઘવારી ઘટી છે. અને રોજગાર ડેટા મજબૂત બન્યો છે. તે જ સમયે, મધ્યમ વર્ગ આગામી મહિને રજૂ થનારા કેન્દ્રીય બજેટમાં આવકવેરા સંબંધિત મોટા સુધારાની અપેક્ષા રાખી રહ્યો છે. આ પરિબળોની અસર નજીકના ભવિષ્યમાં શેરબજાર પર જોવા મળી શકે છે.
