નવી દિલ્હી. ભારતીય ક્રિકેટર વરુણ એરોને આજે ક્રિકેટના તમામ ફોર્મેટમાંથી નિવૃત્તિની જાહેરાત કરી છે. ભારતીય ક્રિકેટ ટીમમાં ફાસ્ટ બોલર તરીકે પોતાનું સ્થાન બનાવનાર વરુણે ઓક્ટોબર 2011માં ડેબ્યૂ કર્યું હતું અને પોતાની પ્રથમ આંતરરાષ્ટ્રીય વન-ડે મેચ રમી હતી. વરુણે તેની ODI ડેબ્યૂના એક મહિના બાદ નવેમ્બર 2011માં ટેસ્ટ ડેબ્યૂ કર્યું હતું. વરુણે ભારત માટે 9 વનડે અને 9 ટેસ્ટ મેચ રમી છે. વરુણે તેની આંતરરાષ્ટ્રીય કારકિર્દીમાં 29 વિકેટ લીધી છે જેમાં વનડેમાં 11 વિકેટ અને ટેસ્ટમાં 18 વિકેટનો સમાવેશ થાય છે.
ઇજાઓને કારણે વરુણની કારકિર્દી વધુ લાંબી ચાલી શકી નહીં. વરુણ લાંબા સમયથી ટીમ ઈન્ડિયાથી દૂર હતો, જોકે આ દરમિયાન તે ડોમેસ્ટિક મેચ રમી રહ્યો હતો. વરુણે તેની છેલ્લી ટેસ્ટ મેચ 2015માં દક્ષિણ આફ્રિકા સામે રમી હતી. આ પહેલા છેલ્લી વખત નવેમ્બર 2014માં વરુણ શ્રીલંકા સામે ઈન્ટરનેશનલ ODI મેચમાં ટીમનો ભાગ હતો. તે ઝારખંડ માટે ડોમેસ્ટિક ક્રિકેટ રમે છે. વરુણનું નામ 2010-11માં આયોજિત વિજય હજારે ટ્રોફી દરમિયાન સૌથી પહેલા ચર્ચામાં આવ્યું હતું જ્યારે તેણે આ ટૂર્નામેન્ટમાં 150 કિલોમીટર પ્રતિ કલાકથી વધુની ઝડપે બોલિંગ કરીને બધાને ચોંકાવી દીધા હતા. જો કે વરુણને ભારત માટે એક પણ T20 ઈન્ટરનેશનલ મેચ રમવાની તક મળી નથી, પરંતુ વરુણે આઈપીએલમાં પોતાની પ્રતિભા ચોક્કસ દેખાડી છે. વરુણે આઈપીએલમાં કુલ 52 મેચ રમી જેમાં તેણે 33.66ની એવરેજથી કુલ 44 વિકેટ ઝડપી.
નિવૃત્તિની જાહેરાત કરતા વરુણે સોશિયલ મીડિયા પોસ્ટમાં લખ્યું, મેં છેલ્લા 20 વર્ષથી ઝડપી બોલિંગના રોમાંચનો ભરપૂર આનંદ માણ્યો છે. મારી આ સફર મારા પરિવાર, મિત્રો, સપોર્ટ સ્ટાફ અને તમારા બધા વિના પૂર્ણ થઈ શકી ન હોત, આ માટે હું મારા તમામ ચાહકોનો આભાર માનું છું. મારી કારકિર્દી દરમિયાન મને જે ગંભીર ઇજાઓ સહન કરવી પડી હતી તેને દૂર કરવામાં મદદ કરવા માટે હું નેશનલ ક્રિકેટ એકેડમીના ફિઝિયો, ટ્રેનર્સ અને કોચનો પણ આભાર માનું છું. ફાસ્ટ બોલિંગ મારો પહેલો પ્રેમ છે, હું મેદાન પર હોઉં કે ન હોઉં, તે હંમેશા મારો હિસ્સો રહેશે.
