અમેરિકામાં ઉડ્ડયન સુરક્ષા સાથે જોડાયેલો એક ખૂબ જ ગંભીર અને ચોંકાવનારો મામલો સામે આવ્યો છે. ઑફ-ડ્યુટી પાયલોટે કથિત રીતે ‘મેજિક મશરૂમ્સ’ (હેલ્યુસિનોજેનિક ડ્રગ)ના પ્રભાવ હેઠળ ફ્લાઇટ દરમિયાન પ્લેનના એન્જિનને બંધ કરવાનો પ્રયાસ કર્યો હતો. પરિસ્થિતિની ગંભીરતાને ધ્યાનમાં લઈને પ્લેનનું તાત્કાલિક ઈમરજન્સી લેન્ડિંગ કરવું પડ્યું હતું. ઘટના બાદ આરોપી પાયલટની ધરપકડ કરવામાં આવી છે.
અમેરિકન મીડિયા રિપોર્ટ્સ અનુસાર, આ ઘટના કોમર્શિયલ ફ્લાઈટ દરમિયાન બની હતી, જ્યારે આરોપી પાઈલટ પેસેન્જર તરીકે પ્લેનમાં સવાર હતો અને તે સમયે ડ્યૂટી પર ન હતો. ફ્લાઇટ દરમિયાન તે કોકપિટ પર પહોંચ્યો અને એન્જિન કંટ્રોલ સાથે ચેડા કરવાનો પ્રયાસ કર્યો. ફરજ પરના પાઈલટોએ સતર્કતા દાખવીને તરત જ તેને કાબૂમાં લઈ વિમાનની સલામતી સુનિશ્ચિત કરી હતી.
કહેવામાં આવી રહ્યું છે કે પૂછપરછ દરમિયાન આરોપી પાયલોટે સ્વીકાર્યું કે તેણે ‘મેજિક મશરૂમ’ ખાધું હતું, જેના કારણે તેની માનસિક સ્થિતિ સામાન્ય નથી. નશાની હાલતમાં જ તેણે આ ખતરનાક પગલું ભર્યું હતું. જોકે આ દાવાની સત્તાવાર પુષ્ટિ મેડિકલ અને ફોરેન્સિક તપાસ રિપોર્ટ બાદ જ થશે.
ઘટના બાદ તરત જ પ્લેનને નજીકના એરપોર્ટ પર સુરક્ષિત રીતે લેન્ડ કરવામાં આવ્યું હતું. વિમાનમાં સવાર તમામ મુસાફરો અને ક્રૂ મેમ્બર સુરક્ષિત છે. કોઈને ઈજા થઈ હોવાના અહેવાલ નથી, પરંતુ મુસાફરોમાં થોડા સમય માટે ગભરાટનું વાતાવરણ હતું.
યુએસ ફેડરલ તપાસ એજન્સીઓ અને એવિએશન એડમિનિસ્ટ્રેશને આ મામલે તપાસ શરૂ કરી દીધી છે. આરોપી પાયલટ વિરુદ્ધ ગંભીર ગુનાહિત કલમો હેઠળ કેસ નોંધવામાં આવ્યો છે. વધુમાં, એરલાઇન્સ અને ઉડ્ડયન સત્તાવાળાઓ હવે ઑફ-ડ્યુટી ક્રૂ સભ્યો માટે કોકપિટ એક્સેસ અને સેફ્ટી પ્રોટોકોલની ફરી તપાસ કરી રહ્યા છે.
આ ઘટનાએ ફરી એક વાર એ પ્રશ્ન ઉભો કર્યો છે કે ઉડ્ડયન ક્ષેત્રે માનસિક સ્વાસ્થ્ય અને ડ્રગ્સના વ્યસનનું મોનિટરિંગ કેટલું કડક હોવું જોઈએ, જેથી મુસાફરોની સલામતી સાથે ચેડા ન થાય.
