પાકિસ્તાન હાલમાં અમેરિકા સાથે તેની મિત્રતા અને તેની વૈશ્વિક છબીને મજબૂત કરવામાં વ્યસ્ત છે. આ દરમિયાન અમેરિકા ગાઝામાં શાંતિ સેના મોકલવા માટે પાકિસ્તાન પર સતત દબાણ કરી રહ્યું છે. ગાઝા માટે ટ્રમ્પની 20-પોઇન્ટની યોજના મુસ્લિમ બહુમતી ધરાવતા દેશોમાંથી ગાઝામાં સૈનિકો મોકલવાનું સૂચન કરે છે. આ સૈનિકોનું કામ ગાઝામાં થોડા સમય માટે શાંતિ જાળવવાનું, તેનું પુનઃનિર્માણ અને આર્થિક સુધારણામાં મદદ કરવાનું રહેશે.
જ્યાં અમેરિકા આસિમ મુનીર પર સતત દબાણ બનાવી રહ્યું છે. તે જ સમયે, અમેરિકી વિદેશ મંત્રી માર્કો રૂબિયોએ સ્પષ્ટ કર્યું છે કે પાકિસ્તાને ગાઝામાં શાંતિ સ્થાપવાના પ્રયાસોમાં સામેલ થવાની ઈચ્છા વ્યક્ત કરી છે, પરંતુ હજુ સુધી કોઈ અંતિમ નિર્ણય લેવામાં આવ્યો નથી. રુબિયોએ એમ પણ કહ્યું કે અમેરિકા પહેલા તમામ પક્ષોને આ અંગે જરૂરી માહિતી આપશે, ત્યારબાદ જ કોઈપણ દેશ પાસેથી નક્કર પ્રતિબદ્ધતા માંગવામાં આવશે.
યુએસ સેક્રેટરી ઓફ સ્ટેટ માર્કો રુબિયોએ શુક્રવારે પુષ્ટિ કરી કે અમે ભાગ લેવા માટે વિચારણા કરવા અથવા ઓછામાં ઓછા તેના પર વિચાર કરવાની ઓફર કરવા બદલ પાકિસ્તાનના ખૂબ આભારી છીએ. મને લાગે છે કે કોઈ નક્કર પ્રતિબદ્ધતા માટે પૂછતા પહેલા આપણે કોઈને વધુ જવાબો આપવા જોઈએ.
રૂબિયોની આ ટિપ્પણી એવા સમયે આવી છે જ્યારે સતત એ વાત સામે આવી રહી છે કે વોશિંગ્ટન પાકિસ્તાન પર સેના મોકલવા માટે દબાણ કરી રહ્યું છે. આ સપ્તાહની શરૂઆતમાં રોઇટર્સના અહેવાલમાં જણાવાયું હતું કે પાકિસ્તાન આર્મી ચીફ અસીમ મુનીર તેમની વધેલી શક્તિની પ્રથમ મોટી કસોટીનો સામનો કરી રહ્યા છે, કારણ કે અમેરિકા પાકિસ્તાન પર સૈનિકો મોકલવા માટે સતત દબાણ કરી રહ્યું છે. બીજી તરફ જો પાકિસ્તાન ગાઝામાં સૈનિકો મોકલશે તો તેના પોતાના નાગરિકો તેની વિરુદ્ધ થઈ શકે છે.
શું છે પાકિસ્તાનનું વલણ?
પાકિસ્તાને એ પણ સ્પષ્ટ કર્યું છે કે ગાઝા માટે પ્રસ્તાવિત ઈન્ટરનેશનલ સ્ટેબિલાઈઝેશન ફોર્સમાં સૈનિકો મોકલવા અંગે હાલમાં કોઈ અંતિમ નિર્ણય લેવામાં આવ્યો નથી. વિદેશ મંત્રી ઈશાક ડારે ગયા મહિને કહ્યું હતું કે પાકિસ્તાન શાંતિ રક્ષા મિશનમાં ભૂમિકા ભજવવા પર વિચાર કરી શકે છે, પરંતુ હમાસને તેના હથિયારો છોડવા માટે દબાણ કરવાનું અમારું કામ નથી.
ડોન અનુસાર, ગુરુવારે સાપ્તાહિક પ્રેસ બ્રીફિંગમાં, પાકિસ્તાનના વિદેશ મંત્રાલયના પ્રવક્તા તાહિર હુસૈન અન્દ્રાબીએ કહ્યું, ISFમાં પાકિસ્તાનની ભાગીદારી અંગે હાલમાં કોઈ નિર્ણય લેવામાં આવ્યો નથી.
અસીમ મુનીર યુએસ જઈ શકે છે
આ દરમિયાન એવુ પણ સામે આવ્યું છે કે આસિમ મુનીર આગામી સપ્તાહમાં વોશિંગ્ટન જઈ શકે છે. આ તમામ બાબતો વચ્ચે તેમની આ યાત્રાને મહત્વપૂર્ણ માનવામાં આવે છે. જ્યાં તે સંભવિત રીતે ડોનાલ્ડ ટ્રમ્પને મળી શકે છે. છેલ્લા છ મહિનામાં ટ્રમ્પ સાથે આ તેમની ત્રીજી બેઠક હશે અને વાટાઘાટોમાં ગાઝા સ્થિરીકરણ યોજનાનો સમાવેશ થાય તેવી અપેક્ષા છે.
