પાકિસ્તાનના પૂર્વ વડાપ્રધાન ઈમરાન ખાનના મૃત્યુની અફવાએ હલચલ મચાવી દીધી છે. જો કે, જેલ પ્રશાસને સ્પષ્ટતા કરી છે કે ખાન સ્વસ્થ છે અને તેને કોઈપણ જેલમાં ટ્રાન્સફર કરવામાં આવ્યો નથી. ખાન ઓગસ્ટ 2023 થી જેલમાં છે, જ્યારે તેને ઇસ્લામાબાદની એક અદાલતે ત્રણ વર્ષની જેલની સજા ફટકારી હતી. તેમને ભ્રષ્ટાચાર સંબંધિત કેસમાં દોષિત ઠેરવવામાં આવ્યા હતા.
ઈમરાન ખાન કેમ જેલમાં છે?
તેની ધરપકડ પહેલા ખાને અલ જઝીરા સાથે વાત કરી અને કહ્યું કે તેની સામે 85 જુદા જુદા કેસ પેન્ડિંગ છે. જાન્યુઆરી 2025 માં, ખાનને જમીન સંબંધિત કેસમાં 14 વર્ષની જેલની સજા ફટકારવામાં આવી હતી. તેમની પત્ની બુશરા બીબીને સાત વર્ષની જેલની સજા ફટકારવામાં આવી હતી.
ભ્રષ્ટાચાર
ખાન પર આરોપ છે કે તેમણે વડાપ્રધાન તરીકેના કાર્યકાળ દરમિયાન રિયલ એસ્ટેટ ડેવલપર પાસેથી ભેટ તરીકે જમીન લીધી હતી અને તેના બદલામાં ગેરકાયદેસર કામો કર્યા હતા. ભૂતપૂર્વ ક્રિકેટર અને તેની પત્ની 2018 માં રચાયેલા ટ્રસ્ટ દ્વારા લાંચ તરીકે ₹700 કરોડની જમીન સ્વીકારવા બદલ દોષી સાબિત થયા હતા.
સરકારી ભેટ
ખાન પર આરોપ છે કે તેઓ જ્યારે વડાપ્રધાન હતા ત્યારે તેમને મળેલી 140 મિલિયન રૂપિયાથી વધુની ગિફ્ટ વેચી હતી. મીડિયા રિપોર્ટ્સ અનુસાર, નોંધાયેલા કેસમાં એવું કહેવામાં આવ્યું છે કે આ ભેટો સરકારી ભેટ હતી.
હિંસા
ખાન પર મે 2023માં ધરપકડ બાદ હિંસા ભડકાવવાનો આરોપ છે. આ કેસમાં પીટીઆઈના ઘણા સમર્થકો પણ સામેલ હતા.
ગોપનીય માહિતી
ખાન પર આરોપ હતો કે તેઓ વડાપ્રધાન હતા ત્યારે ગોપનીય માહિતી આપી હતી. જો કે આ કેસમાં તેને નિર્દોષ જાહેર કરવામાં આવ્યો છે.
શું કહ્યું જેલ પ્રશાસને
જેલ અધિકારીઓએ બુધવારે જણાવ્યું કે ખાન સંપૂર્ણ સ્વસ્થ છે. જેલ સત્તાવાળાઓએ ખાનના સ્વાસ્થ્ય વિશે સોશિયલ મીડિયા પર ફેલાતી અફવાઓને ફગાવી દીધી હતી. અદિયાલા જેલ પ્રશાસને એક નિવેદનમાં જણાવ્યું હતું કે, “પાકિસ્તાન તહરીક-એ-ઈન્સાફ (પીટીઆઈ) પાર્ટીના નેતૃત્વને ઈમરાન ખાનના સ્વાસ્થ્ય વિશે જાણ કરવામાં આવી છે. પીટીઆઈ ચીફને તમામ જરૂરી સુવિધાઓ પૂરી પાડવામાં આવી રહી છે.” જેલ અધિકારીઓએ એક નિવેદનમાં કહ્યું કે ખાનની તબિયત વિશે સોશિયલ મીડિયા પર કરવામાં આવેલા દાવાઓમાં કોઈ સત્ય નથી. અદિયાલા જેલ પ્રશાસને સ્પષ્ટતા કરી હતી કે અદિયાલા જેલમાંથી ઈમરાન ખાનના ટ્રાન્સફરના સમાચાર સંપૂર્ણપણે પાયાવિહોણા છે.
