નવી દિલ્હી. દિલ્હીના જવાહરલાલ નેહરુ સ્ટેડિયમને તોડીને તેની જગ્યાએ નવું ‘સ્પોર્ટ્સ સિટી’ બનાવવાની યોજના ચાલી રહી છે. આ સ્પોર્ટ્સ સિટી 102 એકર વિસ્તારમાં બનાવવામાં આવશે. આ માટે કતાર અને ઓસ્ટ્રેલિયા જેવા દેશોના અત્યાધુનિક સ્પોર્ટ્સ ઈન્ફ્રાસ્ટ્રક્ચરનું મૂલ્યાંકન કરવામાં આવી રહ્યું છે. ‘સ્પોર્ટ્સ સિટી’ની સ્થાપના કરવા પાછળ કેન્દ્રીય રમતગમત મંત્રાલયનો હેતુ રાષ્ટ્રીય રાજધાની દિલ્હીમાં આંતરરાષ્ટ્રીય માપદંડો અનુસાર વિવિધ રમતો સંબંધિત એક સંકલિત અને આધુનિક કેન્દ્રની સ્થાપના કરવાનો છે. મીડિયા રિપોર્ટ્સ અનુસાર સ્પોર્ટ્સ સિટીની ડિઝાઈન અને સુવિધાઓને ઈન્ટરનેશનલ મોડલ્સ પાસેથી શીખીને ફાઈનલ કરવામાં આવશે.
જવાહરલાલ નેહરુ સ્ટેડિયમ એ ભારતમાં સૌથી પ્રસિદ્ધ મલ્ટી-સ્પોર્ટ્સ સંકુલ છે. આ સ્ટેડિયમ 1982 એશિયન ગેમ્સ માટે બનાવવામાં આવ્યું હતું. 2010માં યોજાયેલી કોમનવેલ્થ ગેમ્સ માટે તેનું નવીનીકરણ કરવામાં આવ્યું હતું. જવાહરલાલ નહેરુ સ્ટેડિયમમાં અંદાજે 60 હજાર દર્શકોની બેઠક ક્ષમતા છે. આ સ્ટેડિયમ રાષ્ટ્રીય એથ્લેટિક્સ ટીમનું હોમ વેન્યુ રહ્યું છે. એથ્લેટિક્સ ઈવેન્ટ્સથી લઈને ફૂટબોલ મેચો, મોટા કોન્સર્ટ અને રાષ્ટ્રીય ઉજવણીઓ સુધી અહીં ઘણી મોટી ઈવેન્ટ્સ થઈ છે. આ સ્ટેડિયમ ચાર દાયકાથી વધુ સમયથી ભારતના રમતગમતના ઇતિહાસમાં યોગદાન આપી રહ્યું છે.
આ વર્ષની શરૂઆતમાં સ્ટેડિયમમાં વર્લ્ડ પેરા એથ્લેટિક્સ ચેમ્પિયનશિપનું આયોજન કરવામાં આવ્યું હતું. આ ઇવેન્ટ માટે ખેલાડીઓ માટે અંદાજે રૂ. 30 કરોડના ખર્ચે મોન્ડો ટ્રેક નાખવામાં આવ્યો હતો. મીડિયા રિપોર્ટ્સ અનુસાર, ખેલાડીઓના રહેવા માટે નવા સ્પોર્ટ્સ સિટીમાં એક સોસાયટી પણ બનાવવામાં આવશે જેથી ટૂર્નામેન્ટમાં ભાગ લેવા આવતા વિદેશી ખેલાડીઓને વધુ સારી સુવિધા પૂરી પાડી શકાય. અહીં સ્વિમિંગ પુલ અને ઇન્ડોર અને આઉટડોર ગેમ્સના આયોજનની વ્યવસ્થા કરવામાં આવશે. આ નવા સ્પોર્ટ્સ સિટીને બનાવવામાં પાંચ વર્ષથી વધુ સમય લાગી શકે છે.
