અમદાવાદ, 16 માર્ચ, 2026 – દક્ષિણ બોપલ વિસ્તારમાં આવેલી 54 સોસાયટીઓના સંકલિત પ્રયત્નોથી ભવ્ય વિરાટ હિન્દુ સંમેલનનું સફળ આયોજન કરવામાં આવ્યું, જેમાં વિસ્તારના 3100થી વધુ રાષ્ટ્રપ્રેમી નાગરિકોએ ઉત્સાહપૂર્વક ભાગ લીધો હતો.
કાર્યક્રમની શરૂઆત સવારે ભવ્ય બાઈક રેલી સાથે થઈ, જે સમગ્ર વિસ્તારમાં ફરીને રાષ્ટ્રભાવના અને એકતાનો સંદેશ પ્રસૃત કરતી જોવા મળી. ત્યારબાદ 51 કુંડી રાષ્ટ્ર યજ્ઞનું વૈદિક વિધિપૂર્વક આયોજન કરવામાં આવ્યું, જેમાં મોટી સંખ્યામાં ભક્તજનોએ હાજરી આપી.
સાંજના સમયે 501થી વધુ બાળિકાઓ દ્વારા ભવ્ય કળશયાત્રાનું આયોજન થયું, જે સમગ્ર કાર્યક્રમનું વિશેષ આકર્ષણ બની. મુખ્ય કાર્યક્રમની શરૂઆત સાંજે 5.00 વાગ્યે ગણેશ વંદના અને દીપ પ્રાગટ્ય સાથે કરવામાં આવી.
કાર્યક્રમ દરમિયાન વિવિધ સોસાયટીઓના બાળકો અને નાગરિકો દ્વારા કથક નૃત્ય તેમજ ઓપરેશન સિંદૂર વિષય પર દેશભક્તિથી ઓતપ્રોત નૃત્ય પ્રસ્તુતિઓ રજૂ કરવામાં આવી. દક્ષિણ બોપલ વિસ્તારમાં આવેલી ભારતની એકમાત્ર ડિઝાઇન યુનિવર્સિટીના વિદ્યાર્થીઓએ પર્યાવરણ સંરક્ષણનો સંદેશ આપતી આધુનિક શૈલીની સુંદર નૃત્ય-નાટિકા રજૂ કરી, જેને ઉપસ્થિત સૌએ ખૂબ પ્રશંસા આપી.
