સિડનીના બોન્ડી બીચ પર થયેલા ગોળીબારમાં 13 લોકોના મોત થયા બાદ અમેરિકાના રાષ્ટ્રપતિ ડોનાલ્ડ ટ્રમ્પે મોટું નિવેદન આપ્યું છે. તેમણે તમામ દેશોને કટ્ટરપંથી ઈસ્લામિક આતંકવાદ સામે એક થવાની અપીલ કરી હતી. સિડનીના બોન્ડી બીચ પર યહૂદી હનુક્કાહ તહેવાર દરમિયાન ઇસ્લામિક સ્ટેટ સાથે જોડાયેલા આતંકવાદી હુમલામાં 15 લોકોએ જીવ ગુમાવ્યો હતો. ડોનાલ્ડ ટ્રમ્પે યહૂદી રજાની ત્રીજી રાત્રે વ્હાઇટ હાઉસ ખાતે એક કાર્યક્રમ દરમિયાન બોન્ડી બીચ હુમલાના પીડિતોને શ્રદ્ધાંજલિ આપી. વ્હાઇટ હાઉસ ખાતે આયોજિત હનુક્કાહ રિસેપ્શનમાં ટ્રમ્પે યહૂદી સમુદાય માટે સતત સમર્થન આપવાનું વચન આપ્યું હતું.
અમેરિકી રાષ્ટ્રપતિએ ઓસ્ટ્રેલિયન લોકોને પ્રેમ અને પ્રાર્થનાનો સંદેશ પાઠવતા કહ્યું, “તમામ રાષ્ટ્રોએ કટ્ટરપંથી ઈસ્લામિક આતંકવાદની બુરાઈ સામે એક થવું જોઈએ. હું હંમેશા યહૂદી લોકોનો મિત્ર અને સમર્થક રહીશ.” “અમે તમામ માર્યા ગયેલા લોકોના શોકમાં એકજૂટ છીએ અને ઘાયલોના ઝડપી સ્વસ્થ થવાની પ્રાર્થના કરીએ છીએ. કેટલાક ખૂબ જ ગંભીર રીતે ઘાયલ છે.”
પ્રવાસ પ્રતિબંધ વધુ પાંચ દેશોમાં લંબાયો
ટ્રમ્પે વધુ પાંચ દેશોમાં ટ્રાવેલ પ્રતિબંધ લંબાવ્યો છે. અફઘાનિસ્તાન, મ્યાનમાર, ચાડ, કોંગો, ગિની, એરિટ્રિયા, હૈતી, ઈરાન, લિબિયા, સોમાલિયા અને સુદાનના નાગરિકોને અમેરિકામાં પ્રવેશવા પર પ્રતિબંધ છે. બુરુન્ડી, ક્યુબા, લાઓસ, સિએરા લિયોન, ટોગો, તુર્કમેનિસ્તાન અને વેનેઝુએલામાં પણ મુસાફરી પ્રતિબંધો લંબાવવામાં આવ્યા છે. બુર્કિના ફાસો, માલી, નાઈજર, દક્ષિણ સુદાન અને સીરિયા પણ હવે આ પ્રતિબંધ હેઠળ સામેલ થશે. પેલેસ્ટિનિયન ઓથોરિટી દ્વારા જારી કરાયેલા દસ્તાવેજો પર પ્રવાસ કરતા નાગરિકોને પણ યુએસમાં પ્રવેશવા પર પ્રતિબંધ છે.
