ટીઆરપી ડેસ્ક. ભારત અને અમેરિકા વચ્ચે એક મોટો વેપાર કરાર અંતિમ તબક્કામાં છે. સૂત્રોના જણાવ્યા અનુસાર આ ડીલ હેઠળ ભારતીય આયાત પર અમેરિકન ટેરિફ 50 ટકાથી ઘટીને 15-16 ટકા થઈ શકે છે. આ કરાર મુખ્યત્વે ઉર્જા અને કૃષિ ક્ષેત્ર પર ધ્યાન કેન્દ્રિત કરશે.
એક રિપોર્ટ અનુસાર, ભારત રશિયાથી ક્રૂડ ઓઈલની આયાત ધીમે ધીમે ઘટાડવા પર વિચાર કરી રહ્યું છે, જેનાથી બંને દેશો વચ્ચે આર્થિક સહયોગ વધુ મજબૂત થશે.
આ ડીલ હેઠળ ભારતને અમેરિકાથી નોન-જીનેટિક (નોન-જીએમ) મકાઈ અને સોયામીલ આયાત કરવાની મંજૂરી મળી શકે છે. ઉપરાંત, ટેરિફ અને માર્કેટ એક્સેસની સમયાંતરે સમીક્ષા માટે સંયુક્ત મિકેનિઝમ બનાવવામાં આવશે.
અમેરિકાના રાષ્ટ્રપતિ ડોનાલ્ડ ટ્રમ્પ અને વડાપ્રધાન નરેન્દ્ર મોદી વચ્ચે મંગળવારે ફોન પર વાતચીત થઈ હતી, જેમાં વેપાર અને ઉર્જા મુદ્દાઓ મુખ્ય હતા. ટ્રમ્પે કહ્યું કે પીએમ મોદીએ રશિયા પાસેથી ઓઈલની ખરીદી મર્યાદિત કરવાનું આશ્વાસન આપ્યું છે.
PM મોદીએ X પર લખ્યું કે રાષ્ટ્રપતિ ટ્રમ્પને તેમના કોલ અને દિવાળીની શુભેચ્છાઓ બદલ આભાર. પ્રકાશના આ તહેવાર પર, આપણી બંને લોકશાહીઓ વિશ્વને આશા અને શાંતિનો સંદેશો આપતા રહે અને આતંકવાદના તમામ સ્વરૂપો સામે એકજૂથ રહીએ.
