નવી દિલ્હી. જસપ્રીમ બુમરાહે આજે પોતાના જન્મદિવસ પર ઓસ્ટ્રેલિયા સામે એડિલેડમાં એક રેકોર્ડ પોતાના નામે કર્યો. બુમરાહ એક કેલેન્ડર વર્ષમાં 50 ટેસ્ટ વિકેટ લેનારો ત્રીજો ભારતીય ઝડપી બોલર બન્યો છે. આ સાથે બુમરાહ વર્ષ 2024માં 50 ટેસ્ટ વિકેટ લેનારો પ્રથમ ફાસ્ટ બોલર બની ગયો છે. એડિલેડ ટેસ્ટના પહેલા દિવસે બુમરાહે ઓસ્ટ્રેલિયાના ઓપનર ઉસ્માન ખ્વાજાને પ્રથમ દાવમાં આઉટ કરતાની સાથે જ આ રેકોર્ડ તેના નામે નોંધાયો હતો. બુમરાહે 2024માં 11મી ટેસ્ટમાં આ ખાસ સિદ્ધિ મેળવી હતી. આ સાથે જ બુમરાહનું નામ કપિલ દેવ અને ઝહીર ખાન સાથે જોડાઈ ગયું.
ભારતીય ખેલાડીઓમાં એક કેલેન્ડર વર્ષમાં સૌથી વધુ ટેસ્ટ વિકેટ લેવાનો રેકોર્ડ કપિલ દેવના નામે છે. કપિલ દેવે વર્ષ 1983માં 75 ટેસ્ટ વિકેટ લીધી હતી. આ પહેલા પણ કપિલે આ કારનામું કર્યું હતું. વર્ષ 1979માં કપિલે 74 ટેસ્ટ વિકેટ પોતાના નામે કરી હતી. કપિલ બાદ ઝહીર ખાને 2002માં 51 ટેસ્ટ વિકેટ લઈને રેકોર્ડ બનાવ્યો હતો. હવે આ મહાન ખેલાડીઓની યાદીમાં જસપ્રીત બુમરાહ પણ સામેલ થઈ ગયો છે. જ્યારથી બુમરાહ ટીમ ઈન્ડિયા સાથે જોડાયેલો છે, ત્યારથી તે હંમેશા દરેક ફોર્મેટમાં ટીમ માટે મહત્વપૂર્ણ યોગદાન આપી રહ્યો છે, પછી તે ટેસ્ટ હોય, ODI હોય કે T20.
આ વર્ષની શરૂઆતમાં જસપ્રીત બુમરાહે પણ ભારતને T20 વર્લ્ડ કપ જીતાડવામાં મહત્વની ભૂમિકા ભજવી હતી. વર્લ્ડ કપ ટૂર્નામેન્ટમાં બુમરાહે 8 મેચમાં 15 વિકેટ લીધી હતી. આ રીતે, તે ટૂર્નામેન્ટના વિકેટ લેનારાઓની યાદીમાં તે ત્રીજા સ્થાને રહ્યો. તે જ સમયે, પર્થમાં ઓસ્ટ્રેલિયા સામે રમાયેલી પ્રથમ ટેસ્ટ મેચ દરમિયાન જસપ્રીત બુમરાહે પોતાની ઘાતક બોલિંગનો જાદુ બતાવ્યો હતો અને ભારતની જીતનો પાયો નાખ્યો હતો.
