અમદાવાદઃ ગુજરાતનાં પાટનગર ગાંધીનગરમાં ગુડ ગવર્નન્સ પર રાષ્ટ્રીય પરિષદમાં બોલતા કેન્દ્રીય મંત્રી ડૉ. જિતેન્દ્ર સિંહે અવલોકન કર્યું હતું કે “ગુજરાત ગવર્નન્સ મોડેલ” ઘણી શ્રેષ્ઠ પ્રથાઓ પ્રદાન કરે છે. જેનો સફળતાપૂર્વક અન્યત્ર પણ ઉપયોગ કરી શકાય છે. મંત્રીશ્રીએ યાદ અપાવ્યું કે કેન્દ્રીય સ્તરે સફળતાપૂર્વક અમલમાં મુકવામાં આવેલી ઘણી શાસન નવીનતાઓ સૌપ્રથમ પ્રધાનમંત્રી નરેન્દ્ર મોદીના મુખ્યમંત્રી તરીકેના નેતૃત્વ હેઠળ ગુજરાતમાં રજૂ કરવામાં આવી હતી.
સમગ્ર ભારતમાંથી ઉપસ્થિત નીતિ નિર્માતાઓ, વરિષ્ઠ અમલદારો અને શાસન નિષ્ણાતોને સંબોધતા ડૉ. જિતેન્દ્ર સિંહે છેલ્લા દાયકામાં શાસનમાં થયેલા પરિવર્તનની પ્રશંસા કરી હતી . તેમજ આ પરિવર્તન રાતોરાત થયું ન હોવાનું અને રાષ્ટ્રીય સ્તરે રજૂ કરાયેલા ઘણા સુધારાઓનું સૌ પ્રથમ ગુજરાતમાં પરીક્ષણ અને પરિપૂર્ણતા કરવામાં આવી હોવાનું પણ તેમણે જણાવ્યું હતું.
ડો. જિતેન્દ્ર સિંહે પ્રધાનમંત્રી મોદીના નેતૃત્વમાં શાસન સંસ્કૃતિમાં મૂળભૂત પરિવર્તન પર ભાર મૂક્યો હતો. જેણે દિલ્હીના પરંપરાગત વહીવટી ગઢથી આગળ અને દેશના વિવિધ પ્રદેશોમાં નીતિ નિર્માણને આગળ ધપાવ્યું છે. તેમણે પ્રધાનમંત્રીના શાસનનું વિકેન્દ્રીકરણ કરવાના નિર્દેશનો ઉલ્લેખ કર્યો હતો. જેમાં મુખ્ય નીતિગત ચર્ચાઓ, પરિષદો અને આઉટરીચ કાર્યક્રમો નવી દિલ્હીમાં જ નહીં દેશના વિવિધ ભાગોમાં યોજવામાં આવે તે સુનિશ્ચિત કરવામાં આવ્યું હતું. તેમણે કહ્યું કે, “શાસન સંવાદોને દિલ્હીથી આગળ ખસેડીને, અમે ખાતરી કરી રહ્યા છીએ કે સુધારાઓ વધુ સમાવિષ્ટ હોય અને દેશના ખૂણે ખૂણેથી લોકોની આકાંક્ષાઓનું પ્રતિબિંબ હોવું જોઈએ.”
ગુજરાતના ગાંધીનગર ખાતે બે દિવસીય “ગુડ ગવર્નન્સ પર રાષ્ટ્રીય પરિષદ”નું ઉદ્ઘાટન કર્યા બાદ કેન્દ્રીય રાજ્ય મંત્રી ડૉ. જિતેન્દ્ર સિંહે સંબોધન કર્યું.
