કરાચીમાં એક પત્રકાર, જે એક ટેલિવિઝન ચેનલ પર ઈઝરાયેલ તરફી ટિપ્પણી કરી રહ્યો હતો, તેની હત્યા કથિત રીતે કટ્ટરપંથી ઈસ્લામિક જૂથના કાર્યકરો દ્વારા કરવામાં આવી હતી, એમ સિંધ પ્રાંતના ગૃહ પ્રધાને જણાવ્યું હતું. પત્રકાર અને એન્કર ઈમ્તિયાઝ મીરની 21 સપ્ટેમ્બરે કરાચીના મલીર વિસ્તારમાં ટેલિવિઝન ચેનલની ઓફિસમાંથી બહાર નીકળતી વખતે ગોળી મારીને હત્યા કરવામાં આવી હતી. આ હત્યા માટે ચાર શંકાસ્પદ આતંકવાદીઓની ધરપકડ કરવામાં આવી છે.
ગૃહ પ્રધાન ઝિયાઉલ હસન લંઝારે સોમવારે દાવો કર્યો હતો કે હત્યારાઓ પત્રકાર મીરને ઇઝરાયલ તરફી માનતા હતા અને તેમની ઇઝરાયેલ તરફી ટિપ્પણીઓને કારણે તેમને નિશાન બનાવ્યા હતા. પોલીસ મહાનિરીક્ષક (આઈજીપી) ગુલામ નબી મેમણ અને શહેર પોલીસ વડા જાવેદ આલમ ઓધોએ મીડિયાને જણાવ્યું હતું કે ધરપકડ કરાયેલા ચારેય શખ્સોએ પાકિસ્તાન બહાર સ્થિત તેમના હેન્ડલર્સના આદેશ પર હત્યા કર્યાની કબૂલાત કરી છે.
મેમને કોઈપણ દેશનું નામ લીધા વિના જણાવ્યું હતું કે, ધરપકડ કરાયેલા શકમંદો શિક્ષિત વ્યક્તિઓ છે અને તેમના નેતા પાડોશી દેશમાં રહે છે. ધરપકડ કરાયેલા શકમંદોની ઓળખ અજલલ ઝૈદી, શહાબ અસગર, અહસાન અબ્બાસ અને ફરાઝ અહેમદ તરીકે થઈ છે. તેઓ પ્રતિબંધિત ઝૈનાબીયુન બ્રિગેડના એક ભાગ લશ્કર સરુલ્લા સાથે જોડાયેલા હોવાનું કહેવાય છે.
