વિશ્વની બે મહાસત્તાઓ વચ્ચેનો તણાવ ફરી એકવાર ચરમસીમાએ પહોંચી ગયો છે. મામલો તાઈવાનનો છે, પરંતુ તેની ગરમી વોશિંગ્ટનથી લઈને બીજિંગ સુધી અનુભવાઈ રહી છે. અમેરિકાએ તાઈવાનને હથિયારોનો જંગી ભંડાર આપવાનો નિર્ણય લેતા જ ચીનનો ગુસ્સો ચરમસીમાએ પહોંચી ગયો હતો. ચીને બદલો લેતા મોટી અમેરિકન ડિફેન્સ કંપનીઓના દરવાજા કાયમ માટે બંધ કરવાનો આદેશ જારી કર્યો હતો.
ચીન દ્વારા લેવામાં આવેલા પગલાં ખૂબ જ કડક અને વ્યાપક છે. 20 અમેરિકન સંરક્ષણ કંપનીઓ અને 10 વરિષ્ઠ અધિકારીઓને હવે ચીનની ‘બ્લેક લિસ્ટ’માં મૂકવામાં આવ્યા છે. આ પ્રતિબંધિત કંપનીઓની યાદીમાં પ્રખ્યાત એરક્રાફ્ટ મેન્યુફેક્ચરિંગ કંપની બોઈંગની સેન્ટ લુઈસ શાખાનું નામ ટોચ પર છે. આ સિવાય નોર્થ્રોપ ગ્રુમેન સિસ્ટમ્સ કોર્પોરેશન અને L3 હેરિસ મેરી. સર્વિસ જેવી મોટી કંપનીઓને પણ ફટકો પડ્યો છે.
રિપોર્ટ અનુસાર, ચીનના વિદેશ મંત્રાલયે સ્પષ્ટ કર્યું છે કે આ માત્ર કાગળની વાત નથી. ચીનમાં આ કંપનીઓ અને વ્યક્તિઓની તમામ પ્રકારની સંપત્તિઓ ફ્રીઝ (જપ્ત) કરવામાં આવશે. આનો સીધો મતલબ એ છે કે તેમના પૈસા અને મિલકત તમામ બ્લોક થઈ જશે. ઉપરાંત, ચીનની કોઈ સ્થાનિક સંસ્થા અથવા વ્યક્તિ તેમની સાથે કોઈપણ પ્રકારનો વેપાર કરી શકશે નહીં. આ કડકાઈ એટલી છે કે ડિફેન્સ ફર્મ એન્ડુરિલ ઈન્ડસ્ટ્રીઝના સ્થાપક અને પ્રતિબંધિત કંપનીઓના નવ વરિષ્ઠ અધિકારીઓને પણ ચીનમાં પ્રવેશવા દેવામાં આવશે નહીં.
આ સમગ્ર કાર્યવાહી પાછળ બેઇજિંગનો તર્ક એકદમ સ્પષ્ટ છે. ચીન તાઈવાનને પોતાનો અભિન્ન અંગ માને છે અને આ મુદ્દો તેના સાર્વભૌમત્વનો આત્મા છે. ચીનના વિદેશ મંત્રાલયના પ્રવક્તાએ સ્પષ્ટપણે કહ્યું કે તાઈવાન મુદ્દો ચીન-અમેરિકાના સંબંધોમાં ‘રેડ લાઈન’ છે, જેને કોઈપણ સંજોગોમાં ઓળંગવી જોઈએ નહીં. ચીને અમેરિકાને ચેતવણી આપી છે કે તાઈવાનની આઝાદીની માંગ કરી રહેલા અલગતાવાદી દળોને ખોટા સંકેતો આપવાનું બંધ કરે. બીજિંગે સ્પષ્ટ કર્યું છે કે તે પોતાની . સુરક્ષા અને પ્રાદેશિક અખંડિતતાની સુરક્ષા માટે કોઈપણ હદ સુધી જવા માટે તૈયાર છે. તેમનું કહેવું છે કે જો તાઈવાનના મામલામાં અમેરિકા તરફથી ઉશ્કેરણી ચાલુ રહેશે તો ચીન તેનો વધુ મજબૂત અને નક્કર જવાબ આપશે.
હવે સવાલ એ થાય છે કે અમેરિકાએ એવું શું કર્યું કે ડ્રેગનને આટલો ગુસ્સો આવ્યો? હકીકતમાં, અમેરિકાના ડોનાલ્ડ ટ્રમ્પ વહીવટીતંત્રે તાઇવાનને અત્યાર સુધીના સૌથી મોટા હથિયાર પેકેજમાંથી એકને મંજૂરી આપી છે. આ ડીલ લગભગ $11.1 બિલિયનની છે, જે એક રેકોર્ડ રકમ છે. આ પેકેજમાં કોઈ નાની બંદૂકોનો સમાવેશ થતો નથી, પરંતુ એવા શસ્ત્રોનો સમાવેશ થાય છે જે યુદ્ધનો માર્ગ બદલી શકે છે. જેમાં અત્યાધુનિક મિસાઈલ, હેવી આર્ટિલરી, HIMARS રોકેટ લોન્ચર અને ખતરનાક ડ્રોનનો સમાવેશ થાય છે. ચીનને ડર છે કે આ હથિયારોથી તાઈવાનની સૈન્ય તાકાત વધશે, જે ચીનની સુરક્ષા માટે સીધો પડકાર છે. જો કે, તાઈવાનને શસ્ત્રોના આ પ્રસ્તાવિત વેચાણને હજુ પણ યુએસ કોંગ્રેસની મંજૂરીને આધીન છે, પરંતુ આ પ્રસ્તાવથી જ બંને દેશોના સંબંધોમાં ખટાશ આવી ગઈ છે.
