IPLના સંસ્થાપક લલિત કુમાર મોદીને બોમ્બે હાઈકોર્ટ તરફથી મોટો ઝટકો લાગ્યો છે. કોર્ટે મોદીની અરજીને ફગાવી દીધી છે, જેમાં તેણે ભારતીય ક્રિકેટ કંટ્રોલ બોર્ડ (BCCI)ને એન્ફોર્સમેન્ટ ડિરેક્ટોરેટ (ED)ને ₹10.65 કરોડ ચૂકવવા આદેશ કરવાની માંગ કરી હતી. કોર્ટે અરજીને “મૂર્ખ” ગણાવી અને મોદી પર ₹1 લાખનો દંડ પણ ફટકાર્યો.
કોર્ટની ટિપ્પણીઓ અને દંડ
ન્યૂઝ એજન્સી ANI અનુસાર, બોમ્બે હાઈકોર્ટે આદેશમાં સ્પષ્ટ કહ્યું કે,
“આ અરજી વ્યર્થ છે અને તેથી તેને બરતરફ કરવામાં આવે છે.”
આ સાથે કોર્ટે લલિત મોદીને ચાર સપ્તાહની અંદર ટાટા મેમોરિયલ હોસ્પિટલના ખાતામાં ₹1 લાખનો દંડ જમા કરાવવાનો નિર્દેશ આપ્યો છે. દંડ જમા કરાવ્યા બાદ મોદીએ તેની રસીદ અને સંબંધિત દસ્તાવેજો કોર્ટમાં જમા કરાવવાના રહેશે.
કોર્ટે દંડની રકમ જમા કરાવવા માટે બેંકની વિગતો પણ શેર કરી:
- એકાઉન્ટ નંબર: 1002449683
- IFSC કોડ: CBIN0284241
- બેંકનું નામ: સેન્ટ્રલ બેંક ઓફ ઈન્ડિયા
પીટીશનમાં શું હતી મોદીની માંગ?
લલિત મોદીએ તેમની અરજીમાં દાવો કર્યો હતો કે મે 2018માં ફોરેન એક્સચેન્જ મેનેજમેન્ટ એક્ટ (FEMA) હેઠળ તેમની સામે ₹10.65 કરોડનો દંડ ફટકારવામાં આવ્યો હતો. મોદીની દલીલ હતી કે BCCIએ આ રકમ એન્ફોર્સમેન્ટ ડિરેક્ટોરેટ (ED)ને જમા કરાવવી જોઈએ.
કોર્ટનો નિર્ણય
હાઈકોર્ટે મોદીની આ માંગને ફગાવી ન હતી, પરંતુ તેમની અરજીને “કોઈપણ આધાર વગર” પણ ગણાવી હતી. આ સાથે, કોર્ટે બીસીસીઆઈના પૂર્વ ઉપાધ્યક્ષ લલિત મોદી પર ₹1 લાખનો દંડ ફટકાર્યો છે અને તેમને ચાર અઠવાડિયામાં ટાટા મેમોરિયલ હોસ્પિટલમાં રકમ જમા કરાવવાનો નિર્દેશ આપ્યો છે.
BCCI અને મોદી વચ્ચે વિવાદ ચાલુ છે
લલિત મોદી અને BCCI વચ્ચે લાંબા સમયથી વિવાદ ચાલી રહ્યો છે. IPLના શરૂઆતના દિવસોમાં ચાવીરૂપ ભૂમિકા ભજવનાર મોદીને પાછળથી નાણાકીય અનિયમિતતા અને FEMA ઉલ્લંઘનના ગંભીર આરોપોનો સામનો કરવો પડ્યો. આ ઘટનાથી બંને પક્ષો વચ્ચેના સંબંધો વધુ વણસ્યા છે.
ન્યાયિક પ્રક્રિયાના દુરુપયોગ પર કોર્ટની કડક ટિપ્પણી
હાઈકોર્ટે મોદીની અરજીને ન્યાયિક પ્રક્રિયાનો દુરુપયોગ ગણાવી હતી. કોર્ટનું આ કડક વલણ તેમના અંગત હિતોને આગળ વધારવા માટે કાયદાકીય પ્રક્રિયાનો ઉપયોગ કરનારાઓ માટે એક મજબૂત સંદેશ છે.
