પાકિસ્તાનના હવાઈ હુમલાના જવાબમાં અફઘાનિસ્તાને જોરદાર વળતો હુમલો કર્યો છે. અફઘાનિસ્તાનના મુખ્ય શહેરો કાબુલ, કંદહાર અને પક્તિયા પર પાકિસ્તાનના હવાઈ હુમલાના જવાબમાં, અફઘાન તાલિબાન સરકારે સરહદ પર મોટા પ્રમાણમાં જવાબી લશ્કરી આક્રમણ શરૂ કર્યું છે. અફઘાનિસ્તાન સેનાનો દાવો છે કે તેઓ પાકિસ્તાની વિસ્તારમાં ઘૂસણખોરી કરીને અનેક ચોકીઓ પર કબજો જમાવીને ભારે નુકસાન પહોંચાડ્યું છે.
ચાર કલાક સુધી લડાઈ ચાલી, બે મોટા લશ્કરી થાણા પણ કબજે કર્યા
અફઘાન સંરક્ષણ મંત્રાલયના જણાવ્યા અનુસાર, આ હુમલો પાકિસ્તાન દ્વારા અફઘાન સરહદના ઉલ્લંઘન અને નિર્દોષ નાગરિકોની હત્યાના જવાબમાં કરવામાં આવ્યો હતો. 26 ફેબ્રુઆરીના રોજ રાત્રે લગભગ 8:00 વાગ્યે, અફઘાન સેનાએ ડ્યુરન્ડ લાઇનની નજીક પક્તિકા, પક્તિયા, ખોસ્ટ અને નાંગરહાર જેવા વિસ્તારોમાં એક સાથે હુમલો કર્યો. માત્ર ચાર કલાક ચાલેલા યુદ્ધમાં, અફઘાન મુજાહિદ્દીને પાકિસ્તાનના બે મોટા લશ્કરી થાણા અને 19 ચોકીઓ પર સંપૂર્ણ કબજો જમાવી લીધો, જ્યારે પાકિસ્તાની સૈનિકો ચાર અન્ય ચોકીઓમાંથી પોતાનો જીવ બચાવીને ભાગી ગયા.
કેટલાક પાકિસ્તાની સૈનિકોએ જીવતા પકડ્યા હોવાનો દાવો કર્યો છે. આ લોહિયાળ યુદ્ધમાં 55 પાકિસ્તાની સૈનિકો માર્યા ગયા હોવાનો દાવો કરવામાં આવી રહ્યો છે. અફઘાન સેનાએ ઘણા સૈનિકોના મૃતદેહ લઈ લીધા છે અને કેટલાક પાકિસ્તાની સૈનિકોને જીવતા પણ પકડી લીધા છે. અફઘાન દળોએ એક પાકિસ્તાની ટેન્કને નષ્ટ કરી અને મોટા પ્રમાણમાં આધુનિક શસ્ત્રો અને લશ્કરી વાહન કબજે કર્યું. અફઘાન સંરક્ષણ મંત્રાલયે કહ્યું કે તેના ચીફ ઓફ સ્ટાફના આદેશ પર મધરાતે 12 વાગ્યે હુમલો અટકાવવામાં આવ્યો હતો.
