(G.N.S) તા. 23
ગાંધીનગર,
રાજ્યના પોલીસ વડા ડો.કે.એલ.એન. રાવનો કચ્છ જિલ્લાનો બે દિવસીય વ્યૂહાત્મક પ્રવાસ સફળતાપૂર્વક સંપન્ન થયો છે. 21-22 ફેબ્રુઆરીના રોજ આ મુલાકાત દરમિયાન, રાજ્ય પોલીસ વડાએ સરહદ અને દરિયાઈ સુરક્ષા વ્યવસ્થાને વધુ મજબૂત કરવા શ્રેણીબદ્ધ બેઠકો અને મુલાકાતો યોજી હતી.
ભુજ ખાતે યોજાયેલી ઉચ્ચસ્તરીય ક્રાઈમ કોન્ફરન્સમાં રાજ્યના પોલીસ વડાએ સરહદી વિસ્તારમાં ગુનાખોરીની સ્થિતિની સમીક્ષા કરી હતી. ત્યારબાદ, BSF, ભારતીય વાયુસેના, કોસ્ટ ગાર્ડ, IB અને NTRO જેવી એજન્સીઓના વરિષ્ઠ અધિકારીઓ સાથે એક વિશેષ બેઠક યોજવામાં આવી હતી. જેમાં ઇન્ટેલિજન્સ શેરિંગ, ડ્રગ્સની દાણચોરી અટકાવવા, માછીમારોના પ્રશ્નો અને સંભવિત લાંચ રૂશ્વત સહિતના મહત્વના મુદ્દાઓને ધ્યાનમાં રાખીને તમામ એજન્સીઓ વચ્ચે મજબૂત સંકલન સ્થાપિત કરવા પર ભાર મૂકવામાં આવ્યો હતો. NCORD (નેશનલ કોઓર્ડિનેશન સેન્ટર) ની પ્રગતિ વિશે પણ વિગતવાર ચર્ચા કરવામાં આવી હતી.
આ મુલાકાતના ભાગરૂપે રાજ્યના પોલીસ વડાએ નલિયા પોલીસ સ્ટેશનની મુલાકાત લઈ તેને દત્તક લેવાની જાહેરાત કરી હતી. તેમણે પોલીસ સ્ટેશનના આધુનિકરણ અને સુવિધાઓ માટે રૂ.5 લાખની ગ્રાન્ટ ફાળવવાની પણ જાહેરાત કરી હતી. આ ઉપરાંત પોલીસ અધિકારીઓ, જવાનો અને સ્થાનિક નાગરિકો સાથે ‘બડા ખાના’નું આયોજન કરીને દરેકનું મનોબળ વધાર્યું હતું અને લોકોની સમસ્યાઓ સાંભળવામાં આવી હતી.
ડો.કે.એલ.એન.રાવે જખૌ બીચ પર ધ્વજ ફરકાવીને સુરક્ષા જવાનોને શુભેચ્છા પાઠવી હતી. તેમણે ભારતીય કોસ્ટ ગાર્ડ, બીએસએફ અને ગુજરાત પોલીસના જવાનો સાથે દરિયામાં સંયુક્ત પેટ્રોલિંગ કરીને સુરક્ષા કવચની તૈયારીની ચકાસણી કરી હતી. આ ઉપરાંત તેમણે છેવાડા વિસ્તારમાં આવેલી પિંગલેશ્વર ચોકીની મુલાકાત લીધી હતી અને ત્યાંના પડકારો અને સંવેદનશીલ દરિયાઈ પટ્ટી પર સતર્ક રહેવા માટે જરૂરી સૂચનાઓ આપી હતી.
ડો.રાવે કચ્છની સંવેદનશીલ ભૌગોલિક સ્થિતિને ધ્યાનમાં રાખીને દરિયાઈ અને જમીની સરહદો પર સતર્ક રહેવા, ટેકનોલોજીનો ઉપયોગ વધારવા અને એજન્સીઓ વચ્ચે સીમલેસ સંકલન કરવા માર્ગદર્શન આપ્યું હતું.
આ મુલાકાતે કચ્છની સરહદી સુરક્ષા વ્યવસ્થામાં નવી ઉર્જાનો સંચાર કર્યો છે અને દેશ વિરોધી પ્રવૃત્તિઓ સામે ગુજરાત પોલીસની સજ્જતાને મજબૂત બનાવી છે.
