અમદાવાદ, 21 જાન્યુઆરી 2026: શહેરના મ્યુનિસિપલ કોર્પોરેશનના ફાયર વિભાગમાં સહાયક સ્ટેશન ઓફિસરની ભરતી માટે લેવાયેલી પરીક્ષામાં ગંભીર છબરડો સામે આવતા ભારે વિરોધ બાદ પરીક્ષા રદ કરવાની ફરજ પડી છે. એએમસીના અધિકારીઓએ સ્વીકાર્યુ હતુ કે, ફાયર વિભાગમાં સ્ટેશન સહાયક ઓફિસરની ભરતીની પરીક્ષામાં સિલેબસ બહારના પ્રશ્નો પૂછાયા હોવાની રજૂઆતો મળી હતી તેથી પારદર્શિતા જાળવવા માટે પરીક્ષા રદ કરી દેવામાં આવી છે.
અમદાવાદ મ્યુનિસિપલ કોર્પોરેશનના ફાયર વિભાગમાં સહાયક સ્ટેશન ઓફિસરની 8 જગ્યાઓ માટે ખાતાકીય પરીક્ષાનું આયોજન 20 જાન્યુઆરીના રોજ કરવામાં આવ્યું હતું. આ પરીક્ષા લેવાની જવાબદારી રાષ્ટ્રીય રક્ષા યુનિવર્સિટી (RRU)ને સોંપવામાં આવી હતી. 8 જગ્યાઓ સામે કુલ 32 ઉમેદવારોએ આ પરીક્ષા આપી હતી. જોકે, પરીક્ષા શરૂ થતાની સાથે જ ઉમેદવારોમાં રોષ જોવા મળ્યો હતો. ઉમેદવારોનો આક્ષેપ હતો કે પ્રશ્નપત્રમાં પૂછાયેલા મોટાભાગના પ્રશ્નો નિર્ધારિત સિલેબસની બહારના હતા. જે વિષયોની તૈયારી ઉમેદવારોએ કરી હતી, તેના બદલે અન્ય વિષયોના પ્રશ્નો પૂછાતા પરીક્ષા કેન્દ્ર પર હોબાળો મચ્યો હતો.
એએમસીએ ઉમેદવારોના ભારે વિરોધ બાદ તાત્કાલિક અસરથી આ પરીક્ષા રદ કરવાનો નિર્ણય લીધો છે. મ્યુનિના અધિકારીઓએ સ્વીકાર્યું છે કે સિલેબસ બહારના પ્રશ્નો પૂછાયા હોવાની રજૂઆતો ગંભીર છે અને પારદર્શિતા જાળવવા માટે આ પગલું ભરવું જરૂરી હતું. સિલેબસ બહારના પ્રશ્નો કેવી રીતે પૂછાયા અને આ ક્ષતિ કોના સ્તરેથી થઈ છે, તે અંગે તપાસ કરવાના આદેશ પણ આપવામાં આવ્યા છે. એજન્સી તરીકે રાષ્ટ્રીય રક્ષા યુનિવર્સિટીની કામગીરી સામે પણ સવાલો ઉઠી રહ્યા છે તંત્ર દ્વારા નવી તારીખની જાહેરાત પણ કરી દેવામાં આવી છે. રદ થયેલી આ પરીક્ષા હવે આગામી 11 ફેબ્રુઆરીના રોજ ફરીથી લેવામાં આવશે. ઉમેદવારોએ હવે આ નવી તારીખ મુજબ ફરીથી તૈયારી કરવાની રહેશે
