કોંગ્રેસ નેતા પ્રિયંકા ગાંધી અને બિઝનેસમેન રોબર્ટ વાડ્રાના પુત્ર રેહાન વાડ્રાએ તેની ગર્લફ્રેન્ડ અવિવા બેગ સાથે સગાઈ કરી લીધી છે. આ દંપતીએ સોશિયલ મીડિયા પર પરિવારના નજીકના સભ્યોની હાજરીમાં યોજાયેલા ખાનગી સમારંભની તસવીરો શેર કરીને આ માહિતી આપી હતી.
રેહાન વાડ્રાએ ઈન્સ્ટાગ્રામ પર સગાઈની તસવીરો પોસ્ટ કરી હતી, જેમાં તેણે તારીખ 29 ડિસેમ્બર 2025 પણ લખી હતી. તસવીરોમાં રેહાન અને અવિવા પરંપરાગત ભારતીય કપડામાં જોવા મળે છે. એક તસવીરમાં બંનેનો બાળપણનો ફોટો પણ સામેલ હતો, જેણે લોકોનું ધ્યાન ખેંચ્યું હતું.
મળતી માહિતી મુજબ, રાજસ્થાનના રણથંભોરમાં આ સગાઈ સેરેમનીનું આયોજન ખાનગી રીતે કરવામાં આવ્યું હતું. સૂત્રોના જણાવ્યા અનુસાર, 25 વર્ષીય રેહાને ગયા અઠવાડિયે બંને પરિવારોની હાજરીમાં અવિવાને લગ્ન માટે પ્રપોઝ કર્યું હતું, જેને તેણે સ્વીકારી લીધું હતું. રેહાન અને અવિવા છેલ્લા સાત વર્ષથી એકબીજાના સંબંધમાં છે. એવું માનવામાં આવે છે કે બંને આગામી મહિનામાં લગ્ન કરી લેશે.
