બે ઓવલ, 21 ડિસેમ્બર (IANS). ન્યૂઝીલેન્ડ અને વેસ્ટ ઈન્ડિઝ વચ્ચે બે ઓવલ ખાતે રમાઈ રહેલી ત્રીજી ટેસ્ટ રોમાંચક તબક્કામાં પહોંચી ગઈ છે. ન્યૂઝીલેન્ડે વેસ્ટ ઈન્ડિઝને જીતવા માટે 462 રનનો ટાર્ગેટ આપ્યો છે. ચોથા દિવસની રમતના અંત સુધીમાં વેસ્ટ ઈન્ડિઝે કોઈ પણ નુકશાન વિના 43 રન બનાવી લીધા હતા. જોન કેમ્પબેલ 2 રને અને બ્રાન્ડન કિંગ 37 રને અણનમ છે.
ટેસ્ટ મેચના અંતિમ દિવસે વેસ્ટ ઈન્ડિઝને જીતવા માટે વધુ 419 રન બનાવવાના છે અને તેની તમામ 10 વિકેટ સુરક્ષિત છે. પિચ બેટિંગ માટે અનુકૂળ છે. આવી સ્થિતિમાં પાંચમો દિવસ ખૂબ જ રોમાંચક બની શકે છે. પરિણામ કોઈપણ ટીમની તરફેણમાં જઈ શકે છે અથવા મેચ ડ્રો થઈ શકે છે.
ન્યૂઝીલેન્ડે 2 વિકેટના નુકસાને 306 રન બનાવીને તેનો બીજો દાવ ડિકલેર કર્યો હતો. બંને ઓપનિંગ બેટ્સમેન ટોમ લાથમ અને ડેવોન કોનવેએ બીજી ઇનિંગમાં પણ સદી ફટકારી હતી. લાથમે 101 રન અને કોનવેએ 100 રન બનાવ્યા હતા. બંને વચ્ચે પ્રથમ વિકેટ માટે 192 રનની ભાગીદારી થઈ હતી. કેન વિલિયમસન 40 અને રચિન રવિન્દ્ર 46 રન બનાવીને અણનમ રહ્યા હતા.
પ્રથમ દાવમાં 155 રનની લીડના આધારે ન્યૂઝીલેન્ડે વેસ્ટ ઈન્ડિઝને જીતવા માટે 462 રનનો ટાર્ગેટ આપ્યો છે.
આ પહેલા વેસ્ટ ઈન્ડિઝનો પ્રથમ દાવ 420 રન પર સમાપ્ત થયો હતો. કાવેમ હોજ 275 બોલમાં 123 રન બનાવીને અણનમ રહ્યો હતો. બ્રાન્ડોન કિંગે 63, જ્હોન કેમ્પબેલ અને એલીક અથાન્જેએ 45-45 અને જસ્ટિન ગ્રીવસે 43 રન બનાવ્યા હતા.
ન્યુઝીલેન્ડ તરફથી જેકબ ડફીએ 4, એજાઝ પટેલે 3, માઈકલ રેએ 2 અને ડેરીલ મિશેલે 1 વિકેટ લીધી હતી.
ન્યૂઝીલેન્ડે 8 વિકેટે 575 રન બનાવી પ્રથમ દાવ ડિકલેર કર્યો હતો. ડેવોન કોનવેએ 227 અને ટોમ લાથમે 137 રન બનાવ્યા હતા. રચિન રવિન્દ્ર 72 રન બનાવીને અણનમ રહ્યો હતો.
ન્યૂઝીલેન્ડ ત્રણ ટેસ્ટ મેચની શ્રેણીમાં 1-0થી આગળ છે.
–IANS
PAK
