Hanumangarh Farmers Protest: રાજસ્થાનના હનુમાનગઢ જિલ્લામાં બુધવારે ઇથેનોલ ફેક્ટરીના વિરોધમાં ખેડૂતોનું આંદોલન અચાનક ફાટી નીકળ્યું હતું. ટિબ્બીના રાઠીખેડા ગામમાં મહાપંચાયત બાદ ભીડ ફેક્ટરી પરિસરમાં પહોંચી હતી. બાઉન્ડ્રી વોલ ટ્રેક્ટર વડે તોડી નાખવામાં આવી હતી, અનેક વાહનો સળગાવી દેવામાં આવ્યા હતા અને પોલીસ સાથે ઘર્ષણને કારણે પરિસ્થિતિ વણસી હતી. આ અથડામણમાં સાંગરિયાના કોંગ્રેસના ધારાસભ્ય અભિમન્યુ પુનિયા પણ ઘાયલ થયા છે.
દિવસ દરમિયાન ઇથેનોલ ફેક્ટરી હટાઓ સંઘર્ષ સમિતિ અને વહીવટીતંત્ર વચ્ચેની મંત્રણા અનિર્ણિત રહી હતી. ખેડૂતો દ્વારા બાંધકામ અટકાવવા લેખિતમાં માંગ કરવામાં આવી હતી. મોડી સાંજે મંત્રણા તુટી પડતાં જ ટોળું સીધું ફેક્ટરી તરફ આગળ વધ્યું હતું.
ફેક્ટરીની દિવાલ તોડી પાડ્યા બાદ પરિસરમાં પથ્થરમારો અને આગચંપી શરૂ થઈ હતી. લગભગ દસ વાહનોને આગ ચાંપી દેવામાં આવી હતી, જેમાં જેસીબી, અનેક કાર, બે બાઇક અને એક પોલીસ જીપનો સમાવેશ થાય છે. કેટલાક ખાનગી વાહનોને પણ નુકસાન થયું હતું.
