ટ્રમ્પના ટેરિફ બાદ શરૂ થયેલા અમેરિકા અને ચીન વચ્ચેના ટેકનોલોજીકલ યુદ્ધે હવે નવો વળાંક લીધો છે. ચીને એક એવું પગલું ભર્યું છે જેણે અમેરિકન ટેક્નોલોજી જગતમાં હલચલ મચાવી દીધી છે. બેઇજિંગે સ્પષ્ટપણે સંકેત આપ્યો છે કે વિદેશી AI ચિપ્સ, ખાસ કરીને Nvidia, Intel અને AMD જેવી યુએસ કંપનીઓની ચીપ્સ હવે ચીનના સરકારી ડેટા સેન્ટર્સમાં ઉપલબ્ધ રહેશે નહીં. આ નિર્ણય એવા સમયે આવ્યો છે જ્યારે અમેરિકા અને ચીન વચ્ચે ટેક્નોલોજીકલ યુદ્ધ ચરમસીમાએ છે! નિષ્ણાતોનું કહેવું છે કે ડ્રેગનનું આ નવું પગલું માત્ર અમેરિકન કંપનીઓ માટે જ નહીં, પરંતુ વૈશ્વિક AI રેસમાં ચીનની આત્મનિર્ભરતાનો સંકેત પણ છે અને હવે ડોનાલ્ડ ટ્રમ્પ પણ તેને રોકી શકશે નહીં.
ચીને સ્પષ્ટ કર્યું છે કે તેને હવે Nvidia, Intel અને AMD પાસેથી અમેરિકન ચિપ્સ જોઈતી નથી. ચીનની સરકારે એક નવી ગાઈડલાઈન બહાર પાડી છે જે મુજબ બેઈજિંગમાં તમામ સરકારી ડેટા સેન્ટર પ્રોજેક્ટ્સમાં ચીનમાં બનેલી આર્ટિફિશિયલ ઈન્ટેલિજન્સ (AI) ચિપ્સનો જ ઉપયોગ કરવામાં આવશે. રોઇટર્સના અહેવાલ મુજબ, ચાઇનીઝ રેગ્યુલેટર્સે તાજેતરમાં 30% કરતા ઓછા પૂર્ણતા ધરાવતા ડેટા સેન્ટરોને તેનો ઉપયોગ બંધ કરવાનો આદેશ આપ્યો છે. તેમને નિર્દેશ આપવામાં આવ્યો છે કે તેઓ કાં તો તેમના દ્વારા મુકવામાં આવેલી વિદેશી ચિપ્સ પાછી ખેંચી લે અથવા પેન્ડિંગ ઓર્ડર રદ કરે. જોકે, બાંધકામના અદ્યતન તબક્કામાં પ્રોજેક્ટ્સની અલગથી સમીક્ષા કરવામાં આવશે.
Nvidia ને સૌથી મોટો ફટકો
ચીન સરકારના આ નિર્ણયથી અમેરિકન ચિપ કંપનીઓ Nvidia તેમજ AMD અને Intelને સૌથી વધુ નુકસાન થશે. નિષ્ણાતો માને છે કે આ નવી ચીની માર્ગદર્શિકા Nvidia ને તેના સૌથી મોટા બજારમાંથી અસરકારક રીતે બહાર કાઢી શકે છે. આ Huawei Technologies જેવી કંપનીઓ માટે નવી તકો ઊભી કરશે. જો કે, હજુ સુધી એ સ્પષ્ટ નથી થયું કે આ માર્ગદર્શિકા સમગ્ર દેશમાં લાગુ થશે કે માત્ર અમુક પ્રાંતોમાં.
નિકાસ નિયંત્રણો અને ચીનનો અસંતોષ
TOI ના અહેવાલ મુજબ, બેઇજિંગ લાંબા સમયથી યુએસ નિકાસ નિયંત્રણોથી નારાજ છે, જેનો ઉદ્દેશ્ય ચીનની તકનીકી પ્રગતિને રોકવાનો છે. અમેરિકી સરકારનું કહેવું છે કે ચીનની સેનાને એડવાન્સ ચિપ્સનો ઉપયોગ કરવાથી રોકવા માટે આ પ્રતિબંધો જરૂરી છે. Nvidia CEO જેન્સન હુઆંગે વારંવાર વોશિંગ્ટનને નિકાસ પ્રતિબંધો હળવા કરવાની અપીલ કરી છે. પરંતુ આ પછી પણ ચીન દ્વારા કોઈ છૂટ આપવામાં આવી નથી.
