રશિયા અને યુક્રેન વચ્ચે યુદ્ધ ચાલુ છે. બંને દેશો સતત એકબીજા પર ઘાતક હુમલાઓ કરી રહ્યા છે. આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પે એક મહત્વપૂર્ણ નિવેદન જાહેર કર્યું છે. તેણે રશિયાને ચેતવણી આપી છે કે જો તે યુક્રેન સાથે લાંબા સમયથી ચાલી રહેલા યુદ્ધને ખતમ નહીં કરે તો અમેરિકા યુક્રેનને લાંબા અંતરની ટોમાહોક મિસાઈલ આપી શકે છે. ટ્રમ્પે એરફોર્સ વનમાં પત્રકારો સાથે વાતચીત દરમિયાન આ નિવેદન આપ્યું હતું.
ટ્રમ્પે શું કહ્યું?
અમેરિકી રાષ્ટ્રપતિએ કહ્યું, “હું કહીશ કે જો આ યુદ્ધ સમાપ્ત નહીં થાય, તો હું તેમને ટોમાહૉક મોકલીશ. ટોમાહોક એક મહાન હથિયાર છે, ખૂબ જ આક્રમક હથિયાર છે.” ટ્રમ્પે પત્રકારોને કહ્યું, “હું તેમને કહીશ કે જો યુદ્ધ સમાપ્ત ન થાય, તો અમે તે કરી શકીએ છીએ.” જો કે, ટ્રમ્પે ઉમેર્યું, “સંભવ છે કે આપણે તે ન કરીએ, અને તે પણ શક્ય છે કે આપણે કરીએ. મને લાગે છે કે આપણે તેને રાખવું જોઈએ.”
ઝેલેન્સકી સાથે વાત કર્યા બાદ ટ્રમ્પનું નિવેદન
ડોનાલ્ડ ટ્રમ્પની ટિપ્પણીઓ રવિવારે યુક્રેનના રાષ્ટ્રપતિ વોલોડીમિર ઝેલેન્સકી સાથે ફોન પર વાતચીત પછી આવી છે. ટ્રમ્પે કહ્યું કે તેમણે તે વાતચીત દરમિયાન ટોમહોક મિસાઈલ મોકલવાની શક્યતાનો ઉલ્લેખ કર્યો હતો. “આ એક ખૂબ જ આક્રમક પગલું છે,” તેમણે કહ્યું. ટ્રમ્પની ટિપ્પણીઓ રશિયાએ યુક્રેનિયન પાવર પ્લાન્ટ પર રાતોરાત હુમલો કર્યા પછી આવી છે, જે શિયાળા પહેલા યુક્રેનના ઉર્જા માળખાને નષ્ટ કરવાના તેના અભિયાનનો ભાગ છે.
રશિયાએ ચિંતા વ્યક્ત કરી
રશિયાએ અમેરિકા દ્વારા યુક્રેનને ટોમહોક ક્રુઝ મિસાઈલોની સપ્લાય કરવાની સંભાવના પર ચિંતા વ્યક્ત કરી છે. પુતિને અગાઉ કહ્યું હતું કે અમેરિકા દ્વારા યુક્રેનને લાંબા અંતરની મિસાઇલોની સપ્લાય મોસ્કો અને વોશિંગ્ટન વચ્ચેના સંબંધોને ગંભીર રીતે નુકસાન પહોંચાડશે. યુદ્ધ અંગે ટ્રમ્પે કહ્યું કે, “મને ખરેખર લાગે છે કે પુતિન આ મુદ્દાને ઉકેલે તો તે તેમના માટે સારું રહેશે, અને જો તે નહીં કરે તો તે તેમના માટે ખરાબ હશે.”
