કેન્દ્રની નરેન્દ્ર મોદી સરકાર આગામી સંસદના બજેટ સત્રમાં નોકરીયાત લોકોને મોટી રાહત આપવાની તૈયારી કરી રહી છે. સરકાર એક નવું ઇન્કમટેક્સ બિલ લાવવાની યોજના બનાવી રહી છે, જેનો હેતુ વર્તમાન આવકવેરા કાયદાને સરળ બનાવવા, તેને સમજી શકાય તેવો બનાવવા અને પૃષ્ઠોની સંખ્યા લગભગ 60 ટકા ઘટાડવાનો છે. કરદાતાઓ માટે આ પગલું રાહતરૂપ સાબિત થશે, કારણ કે આનાથી તેઓ આવકવેરા સંબંધિત પાસાઓને સરળતાથી સમજી શકશે.
શું છે યોજના?
એક સૂત્રના જણાવ્યા અનુસાર નવો આવકવેરા કાયદો સંસદના બજેટ સત્રમાં રજૂ કરવામાં આવશે. આ વર્તમાન કાયદામાં સુધારો નહીં પરંતુ નવો કાયદો હશે. હાલમાં, કાયદા મંત્રાલય દ્વારા આ કાયદાનો મુસદ્દો વિચારણા હેઠળ છે અને તેને બજેટ સત્રના બીજા ભાગમાં સંસદમાં રજૂ કરવામાં આવી શકે છે.
આયોજન સમિતિ
નાણા પ્રધાન નિર્મલા સીતારમણે જુલાઈના બજેટમાં જાહેરાત કરી હતી કે આવકવેરા અધિનિયમ, 1961ની વ્યાપક સમીક્ષા કરવામાં આવશે. સીબીડીટીએ આ સમીક્ષા માટે એક આંતરિક સમિતિની રચના કરી છે, જેનો ઉદ્દેશ્ય કાયદાને સંક્ષિપ્ત, સ્પષ્ટ અને સમજવામાં સરળ બનાવવાનો છે. આનાથી વિવાદો અને મુકદ્દમામાં ઘટાડો થશે, તેમજ કરદાતાઓને વધુ કરની નિશ્ચિતતા મળશે. કાયદાના વિવિધ પાસાઓની સમીક્ષા કરવા માટે 22 વિશેષ પેટા સમિતિઓની પણ રચના કરવામાં આવી છે.
બજેટ સત્રની તારીખો
બજેટ સત્ર 31 જાન્યુઆરીથી 4 એપ્રિલ સુધી ચાલશે. તેનો પ્રથમ ભાગ 31 જાન્યુઆરીથી 13 ફેબ્રુઆરી દરમિયાન યોજાશે, જેમાં રાષ્ટ્રપતિ દ્રૌપદી મુર્મુ લોકસભા અને રાજ્યસભાના સંયુક્ત સત્રને સંબોધિત કરશે. આ પછી 2024-25 માટેનો આર્થિક સર્વે રજૂ કરવામાં આવશે. નાણાકીય વર્ષ 2025-26 માટે કેન્દ્રીય બજેટ 1 ફેબ્રુઆરીએ રજૂ કરવામાં આવશે. સંસદ 10 માર્ચે ફરી મળશે અને 4 એપ્રિલ સુધી ચાલશે.
આ પ્રસ્તાવિત નવા ઈન્કમટેક્સ બિલથી નોકરીયાત લોકોને રાહત મળવાની અપેક્ષા છે, જેથી તેઓ તેમની નાણાકીય બાબતોને વધુ સારી રીતે સંભાળી શકશે.
