ડોલર વિરુદ્ધ રૂપિયો: ડૉલરની મજબૂત માંગના કારણે ભારતીય રૂપિયો તેની ચમક જાળવી રાખવામાં નિષ્ફળ રહ્યો છે. આજે ઘટાડા સાથે ખુલ્યા બાદ રૂપિયો 11 પૈસા ઘટીને ડોલર સામે 85.97ની રેકોર્ડ નીચી સપાટીએ પહોંચી ગયો છે. જે ગઈ કાલે 85.86 પર બંધ રહ્યો હતો. આજે ઈન્ટ્રા-ડે રૂપિયો 85.8638 થી 85.9750ની રેન્જમાં ટ્રેડ થઈ રહ્યો હતો.
યુએસ ડૉલર અને ટ્રેઝરી યીલ્ડ સતત નવી ઊંચાઈને આંબી રહ્યા છે કારણ કે ફેડરલ રિઝર્વ દરમાં ઘટાડા અંગે કઠોર વલણ અપનાવવાનું ચાલુ રાખે છે. બીજી તરફ ભારતીય શેરબજારમાંથી વિદેશી રોકાણકારો દ્વારા સતત વેચવાલી અને ક્રૂડ ઓઈલના ભાવમાં વધારાને કારણે આયાતકારો પાસેથી ડોલરની માંગ વધી છે.
આરબીઆઈએ પગલાં લેવા પડશે
ફોરેન એક્સચેન્જ એક્સપર્ટનું કહેવું છે કે છેલ્લા 15 દિવસથી ફોરેન એક્સચેન્જ માર્કેટમાં ડોલર સામે રૂપિયો સતત ગગડી રહ્યો છે. દેશનો જીડીપી ગ્રોથ રેટ નબળો રહેવાની અને કંપનીઓના ત્રિમાસિક પરિણામો પણ નબળા રહેવાની શક્યતાને કારણે સેન્ટિમેન્ટ બગડ્યું છે. રૂપિયાને વધુ ગગડવાથી બચાવવા માટે આરબીઆઈએ ડોલરનું ભારે વેચાણ કરવું પડશે.
રૂપિયો નબળો પડવાથી શું થશે અસર?
ડોલર સામે રૂપિયો નબળો પડવાને કારણે આયાત મોંઘી થશે. ક્રૂડ ઓઈલના ભાવમાં વધારાની સાથે રૂપિયામાં પણ ઘટાડો થયો છે. આનાથી ભારત માટે ક્રૂડની ખરીદી મોંઘી થશે, જે 80 ટકા આયાત આધારિત છે. પેટ્રોલ અને ડીઝલના ભાવ વધશે. આ સિવાય ઈલેક્ટ્રોનિક્સ સાધનોની કિંમત પણ વધશે કારણ કે સેમી-કન્ડક્ટર ચિપ્સની આયાત પણ મોંઘી થશે. બીજી તરફ નિકાસકારો ડોલરમાં વધુ કમાણી કરશે. સેવાઓની નિકાસ કરતી આઈટી અને ફાર્મા કંપનીઓના નફામાં વધારો થશે. કમાણી વધશે.
