નવી દિલ્હી: મેન્યુફેક્ચરિંગ અને સર્વિસ સેક્ટરમાં ખરાબ પ્રદર્શનને કારણે દેશનો આર્થિક વિકાસ દર ચાલુ નાણાકીય વર્ષ 2024-25માં ઘટીને 6.4 ટકાના ચાર વર્ષની નીચી સપાટીએ રહેવાની શક્યતા છે. મંગળવારે જાહેર કરવામાં આવેલા સરકારી આંકડામાં આ અનુમાન વ્યક્ત કરવામાં આવ્યું છે.
નાણાકીય વર્ષ 2020-21 પછી 6.4 ટકા જીડીપી સૌથી નીચો છે. નોંધનીય છે કે વર્ષ 2020-21માં કોવિડના કારણે જીડીપી માઈનસ 5.8 ટકા હતો. જીડીપી 2021-22માં 9.7 ટકા, 2022-23માં 7 ટકા અને 2023-24માં 8.2 ટકા રહેશે.
નાણાકીય વર્ષ 2024-25 માટે NSOનો 6.4 ટકા વૃદ્ધિનો અંદાજ ભારતીય રિઝર્વ બેન્કના અંદાજ કરતાં ઓછો છે. આરબીઆઈએ ડિસેમ્બર 2024માં જાહેર કરેલા તેના અંદાજમાં કહ્યું હતું કે ચાલુ નાણાકીય વર્ષમાં જીડીપી 6.6 ટકા રહેશે.
આ સિવાય NSOનો આ અંદાજ પણ નાણાં મંત્રાલયના અંદાજ કરતા ઓછો છે. નાણા મંત્રાલયે ચાલુ નાણાકીય વર્ષમાં જીડીપી 6.5 ટકા રહેવાનો અંદાજ મૂક્યો હતો. આ અગાઉથી અંદાજોનો ઉપયોગ નાણામંત્રી નિર્મલા સીતારમણ દ્વારા 1 ફેબ્રુઆરીએ લોકસભામાં રજૂ થનાર બજેટ તૈયાર કરવા માટે કરવામાં આવે છે. NSOના અંદાજ મુજબ, 2024-25ના નાણાકીય વર્ષમાં મેન્યુફેક્ચરિંગ સેક્ટરનો વિકાસ દર 5.3 ટકા રહેશે. જે ગયા નાણાકીય વર્ષમાં 9.9 ટકા હતો. 2024-25માં સર્વિસ સેક્ટરનો વિકાસ દર 5.8 ટકા રહેવાનો અંદાજ છે. જે ગયા નાણાકીય વર્ષમાં 6.4 ટકા હતો.
નોંધનીય છે કે સેવા ક્ષેત્રમાં વેપાર, હોટલ, પરિવહન અને સંદેશાવ્યવહારનો સમાવેશ થાય છે. 2024-25માં કૃષિ ક્ષેત્રનો વિકાસ દર 3.8 ટકા રહેવાનો અંદાજ છે. જે ગયા નાણાકીય વર્ષમાં 1.4 ટકા હતો. NSOના અંદાજ મુજબ, 2024-2025માં ભારતીય અર્થતંત્રનું કદ $3.8 ટ્રિલિયન હોવાનો અંદાજ છે.
