કોલ્લમ, 10 ડિસેમ્બર (NEWS4). કેરળના કોલ્લમની વિજિલન્સ કોર્ટે સબરીમાલા સોનાની ચોરીના કેસમાં એન્ફોર્સમેન્ટ ડિરેક્ટોરેટ (ED) ને કેસ રેકોર્ડ પ્રદાન કરવા અંગેની અરજી પરની સુનાવણી ફરી એકવાર મુલતવી રાખી છે. સ્પેશિયલ ઇન્વેસ્ટિગેશન ટીમ (SIT) દ્વારા લેખિત વાંધાઓ દાખલ કરવા માટે વધુ સમય માંગ્યા બાદ કોર્ટે હવે આગામી સુનાવણી 17 ડિસેમ્બરે નિયત કરી છે.
EDએ કોર્ટમાં FIR, રિમાન્ડ રિપોર્ટ, આરોપીઓના નિવેદનો અને અન્ય મહત્વપૂર્ણ દસ્તાવેજો પ્રદાન કરવાની માંગ કરી છે, જેથી કેસમાં સંભવિત મની લોન્ડરિંગ લિંકની તપાસ આગળ વધારી શકાય. એજન્સીનું કહેવું છે કે આ કેસ પ્રિવેન્શન ઓફ મની લોન્ડરિંગ એક્ટ (PMLA)ના કાર્યક્ષેત્રમાં આવે છે, તેથી નાણાકીય વ્યવહારોની તપાસ કરવાની અને સંબંધિત સંપત્તિઓને જોડવાની તેની કાનૂની જવાબદારી છે.
તે જ સમયે, SIT એ EDની માંગનો સખત વિરોધ કર્યો છે. તપાસ ટીમનું કહેવું છે કે મામલો અત્યંત સંવેદનશીલ છે અને આ તબક્કે દસ્તાવેજોની વહેંચણી મુખ્ય તપાસને અસર કરી શકે છે. આથી તેણે લેખિત વાંધાઓ દાખલ કરવા માટે વધારાનો સમય માંગ્યો હતો, જે કોર્ટે સ્વીકાર્યો હતો.
હાઈકોર્ટની સૂચના બાદ EDએ આ અરજી દાખલ કરી હતી. હાઈકોર્ટની ડિવિઝન બેન્ચે કહ્યું હતું કે, દસ્તાવેજો આપવા અંગેનો નિર્ણય સરકારનો પક્ષ સાંભળ્યા પછી જ લેવામાં આવે.
સબરીમાલા સોનાની ચોરીના કેસમાં, એસઆઈટીએ અત્યાર સુધીમાં ત્રાવણકોર દેવસ્વોમ બોર્ડના બે ભૂતપૂર્વ પ્રમુખો એ. પદ્મકુમાર અને એન. વાસુની સાથે બોર્ડના વર્તમાન અધિકારીની ધરપકડ કરી છે અને મુખ્ય આરોપી ઉન્નીકૃષ્ણન પોટ્ટીની ધરપકડ કરવામાં આવી છે. પદ્મકુમાર અને વાસુ બંનેને મુખ્યમંત્રી પિનરાઈ વિજયનના નજીકના માનવામાં આવે છે.
SITના વાંધાઓ અને EDની દલીલોને ધ્યાનમાં લીધા બાદ કોર્ટ હવે 17 ડિસેમ્બરે વધુ નિર્ણય લેશે.
–NEWS4
ડીએસસી
