રાયપુર. રાજધાની રાયપુરના ટાગોર નગર સ્થિત જિલ્લા શિક્ષણ અધિકારી (DEO)ની ઓફિસમાં સોમવારે ભીષણ આગ લાગી હતી. આગ લાગતા જ સમગ્ર વિસ્તારમાં અફરાતફરી મચી ગઈ હતી. ઘટનાની જાણ થતા જ ફાયર વિભાગની ટીમ ઘટના સ્થળે પહોંચી આગને બુઝાવવાની કામગીરી શરૂ કરી હતી. આ મામલો કોતવાલી પોલીસ સ્ટેશન વિસ્તારનો છે.
પ્રત્યક્ષદર્શીઓના જણાવ્યા અનુસાર આગ ડીઈઓ ઓફિસના સ્ટોર રૂમમાં લાગી હતી, જ્યાં મહત્વપૂર્ણ ફાઈલો અને દસ્તાવેજો રાખવામાં આવ્યા હતા. આગ થોડી જ વારમાં વિકરાળ સ્વરૂપ ધારણ કરી આસપાસના વિસ્તારોમાં ફેલાઈ ગઈ હતી. આ દરમિયાન ઘણા મહત્વપૂર્ણ દસ્તાવેજો બળીને રાખ થઈ ગયા હતા, જેના કારણે મોટા પ્રમાણમાં નુકસાન થવાની આશંકા છે.
ઘટનાસ્થળે ફાયર વિભાગની બે ગાડીઓ આગ પર કાબૂ મેળવવામાં વ્યસ્ત હતી. સ્થિતિને કાબુમાં લેવા માટે પોલીસ ફોર્સ પણ તૈનાત કરવામાં આવી છે. હાલ આગનું કારણ જાણી શકાયું નથી અને તપાસ ચાલી રહી છે.
