રાજસ્થાન સરકારે સોમવારે બેન્ક ઓફ બરોડા (BOB) અને બેન્ક ઓફ મહારાષ્ટ્ર (BoM) સાથે તેના ઈન્ફ્રાસ્ટ્રક્ચર પ્રોજેક્ટ્સ માટે મેમોરેન્ડમ ઓફ અન્ડરસ્ટેન્ડિંગ (MOU) પર હસ્તાક્ષર કર્યા છે. આ કરાર હેઠળ, રાજ્યને બંને બેંકો પાસેથી દર વર્ષે કુલ રૂ. 30,000 કરોડની લોન મળશે, જે રાજ્યની વિકાસ યોજનાઓને પૂર્ણ કરવામાં મદદ કરશે.
બેંક ઓફ બરોડા આગામી છ વર્ષ એટલે કે 31 માર્ચ 2030 સુધી રાજ્ય સરકારને દર વર્ષે રૂ. 20,000 કરોડની લોન આપશે. આ સિવાય બેંક ઓફ મહારાષ્ટ્ર દર વર્ષે 10,000 કરોડ રૂપિયાની લોન પણ આપશે. આ ભંડોળનો ઉપયોગ મુખ્યત્વે રાજ્યમાં વિવિધ પ્રોજેક્ટ્સ માટે કરવામાં આવશે, જેમાં પાવર અને રિન્યુએબલ એનર્જી, રોડ બાંધકામ, પીવાના પાણીનો પુરવઠો અને સ્વચ્છતા જેવી યોજનાઓનો સમાવેશ થાય છે.
સમારોહમાં રાજસ્થાનના મુખ્યમંત્રી ભજન લાલ શર્માએ જણાવ્યું હતું કે રાજ્ય સરકારે ‘વિકસિત રાજસ્થાન 2047’ની યોજના બનાવી છે, જે અંતર્ગત આગામી સમયમાં રાજ્યની અર્થવ્યવસ્થાને $350 બિલિયન સુધી લઈ જવાનું લક્ષ્ય નક્કી કરવામાં આવ્યું છે. તેમણે કહ્યું કે આ એક્શન પ્લાન હેઠળ ઈન્ફ્રાસ્ટ્રક્ચર ડેવલપમેન્ટ અને ઈન્ક્લુઝિવ ડેવલપમેન્ટ માટે 10 ઠરાવો નક્કી કરવામાં આવ્યા છે. મુખ્યમંત્રીએ એમ પણ કહ્યું કે રાજ્ય સરકાર લોક કલ્યાણના સિદ્ધાંત પર કામ કરી રહી છે.
