રાજકોટ, 02 માર્ચ, 2026: Lack of basic facilities in 10 societies in Rajkot રાજકોટ મ્યુનિ.કોર્પોરેશનને પ્રોપર્ટી ટેક્સ, વિવિધ વેરાઓ તેમજ સરકારી ગ્રાન્ટ સહિત કરોડો રૂપિયાની આવક છે. પણ શહેરની ઘણી સોસાયટીના રહિશો હજુ પણ પ્રાથમિક સુવિધાઓથી વંચિત છે. શહેરના જામનગર રોડ પર આવેલી અમી હાઇટ્સ તેમજ તેની આસપાસની 10 જેટલી સોસાયટીઓમાં જવા માટે ઉબડ-ખાબડ કાચો રસ્તો છે. તેમજ સ્ટ્રીટ લાઈટ, પાણીની સુવિધા અને સિટીબસની સુવિધા પણ નથી. સ્થાનિક રહિશોએ અનેકવાર રજુઆત કરી છતાંયે મ્યુનિ.કોર્પોરેશન દ્વારા વિકાસ માટે કોઈ રસ દાખવવામાં આવતો નથી. લાંબા સમયથી પ્રાથમિક સુવિધાઓનાં અભાવ વચ્ચે જીવતા સ્થાનિકોએ આજે રસ્તા, સ્ટ્રીટ લાઈટ અને સફાઈની સમસ્યાઓને લઈને રોષ વ્યક્ત કર્યો હતો. અનેક રજૂઆતો છતાં તંત્ર દ્વારા કોઈ નક્કર પગલાં લેવામાં ન આવતા તેઓએ આગામી ચૂંટણીના બહિષ્કારની ચીમકી ઉચ્ચારી છે.
રાજકોટ મ્યુનિ.કોર્પોરેશનમાં વર્ષોથી ભાજપનું શાસન છે. ધારાસભ્યો અને સાંસદ પણ ભાજપના છે. ત્યારે મ્યુનિ.કોર્પોરેશન દ્વારા કેટલાક વિસ્તારોમાં પ્રાથમિક સુવિધાના કામો કરાતા ન હોવાની ફરિયાદો ઊઠી છે. શહેરના જામનગર રોડ પર આવેલી અમી હાઇટ્સ અને તેની આસપાસની 10 સોસાયટીઓના રસ્તાઓની હાલત ગામડાના કાચા રસ્તા જેવી છે. સ્થાનિકોનું કહેવું છે કે, ચોમાસામાં તો આ રસ્તાઓ પર ચાલવું પણ મુશ્કેલ બની જાય છે. ખાડાઓ અને કાદવ-કીચડને કારણે વારંવાર અકસ્માતો સર્જાય છે. આ ઉપરાંત, સ્ટ્રીટ લાઈટના અભાવે રાત્રિના સમયે અંધારપટ છવાયેલો રહે છે, જેના કારણે મહિલાઓ અને બાળકોમાં ભયનો માહોલ રહે છે. સફાઈ કામદારો પણ નિયમિત આવતા નથી, જેના કારણે ગંદકીનું સામ્રાજ્ય ફેલાયું છે. સિટિબસની સુવિધા પણ આ વિસ્તારમાં ન હોવાથી લોકોને અવરજવરમાં ભારે મુશ્કેલીનો સામનો કરવો પડી રહ્યો છે. આ વિસ્તારના લોકોનું કહેવું છે કે, અમે નિયમિત વેરો ભરીએ છીએ, છતાં અમને પાયાની સુવિધાઓ કેમ મળતી નથી ?
સ્થાનિક લોકોએ જણાવ્યું હતું કે, અમે જામનગર રોડ પર અમી હાઈટ્સ પાસે રહીએ છીએ. અહીં છેલ્લા 10 વર્ષથી રોડ-રસ્તાની વિકટ સમસ્યા છે. રસ્તાઓ સાવ બિસ્માર હાલતમાં છે, જાણે કોઈ અંતરિયાળ ગામડામાં રહેતા હોય તેવો અનુભવ થાય છે. રાત્રે સ્ટ્રીટ લાઈટ ન હોવાને કારણે અંધારપટ છવાયેલો રહે છે, જેથી મહિલાઓ અને બાળકોને નીકળવામાં ડર લાગે છે.
