રાજકોટ, 26 ફેબ્રુઆરી, 2026: રાજકોટમાં નાણા ઉચાપતનો એક વિચિત્ર કિસ્સો પ્રકાશમાં આવ્યો છે. એક બદમાશે એક જ દિવસમાં શહેરની ત્રણ બેંકમાંથી કેશિયરની આંખ સામે જ રૂપિયા 50,000 સેરવી લીધા અને કોઈને ખબર પણ ન પડી.
મીડિયા અહેવાલ અનુસાર આ ઘટનાની વિગત એવી છે કે, રાજકોટમાં એક જ દિવસમાં ત્રણ બેંક દ્વારા પોલીસ ફરિયાદ નોંધાવવામાં આવી હતી કે કોઈ વ્યક્તિએ કેશ કાઉન્ટર ઉપરથી કેશિયરની સામે જ ઉચાપત કરી લીધી છે. આ પૈકી બે ખાનગી બેંકો છે જ્યારે એક સ્મૉલ ફાઈનાન્સ બેંક છે.
બન્યું એવું કે, એક વ્યક્તિ 20,000 રૂપિયાની રૂ. 200ની નોટાના બંડલ લઈને કેશ કાઉન્ટર ઉપર પહોંચ્યો અને તેના બદલે રૂપિયા 500ના બંડલ આપવા વિનંતી કરી. આ ચાલાકી તેણે ત્રણે બેંકમાં અપનાવી. કેશિયરોએ એ પ્રમાણે કર્યું. રૂ. 500ના બંડલ લઈને તેને ગણવાનો ડોળ કરતો રહ્યો અને એ દરમિયાન તેમાંથી કેટલીક નોટો સેરવીને ખીસામાં મૂકી દીધી. ત્યારબાદ રૂ. 500ના એ બંડલ કેશિયરોને પાછા આપતા વિનંતી કરી કે મારે તો નવી નોટોના બંડલ જોઈએ છે. કેશિયરોને ત્યારે પણ કોઈ શંકા ન ગઈ અને તેને નવી નોટોના બંડલ આપી દીધા.
બદમાશે ખૂબ ચાલાકીથી આ બધું પાર પાડ્યું અને એ રીતે ત્રણે બેંકમાંથી અંદાજે રૂ. 50,000 સેરવી લીધા અને નાસી ગયો.
