ઇમ્ફાલ, 20 ડિસેમ્બર (IANS). મણિપુરના તેંગનોપલ જિલ્લામાં શનિવારે અચાનક એક બોમ્બ વિસ્ફોટ થતાં ત્રણ સગીર છોકરાઓ ઘાયલ થયા હતા. અધિકારીઓએ આ માહિતી આપી હતી.
ઇમ્ફાલ પોલીસના એક અધિકારીએ જણાવ્યું કે વિસ્ફોટ તેંગનોપલ જિલ્લાના પાલેલ નજીક મોલનોઇ ગામમાં થયો હતો, જે કુકી જનજાતિનું પ્રભુત્વ ધરાવતો વિસ્તાર છે. પ્રાથમિક માહિતી અનુસાર, બાળકો જૂના મોર્ટાર શેલ સાથે રમતા હતા ત્યારે તે વિસ્ફોટ થયો હતો.
ઘાયલ બાળકોની ઓળખ હેનુગાઓ બાઈટ (10), જામગુનસેઈ બાઈટે (8) અને નગામગુઆંગ હાઓકીપ (8) તરીકે થઈ છે. પોલીસના જણાવ્યા અનુસાર, મ્યાનમારની સરહદે આવેલા તેંગનોપલ જિલ્લામાંથી મળેલા અહેવાલોના આધારે, ત્રણેય બાળકોને તાત્કાલિક આસામ રાઈફલ્સની 26મી બટાલિયનની હોસ્પિટલમાં દાખલ કરવામાં આવ્યા હતા.
અધિકારીઓએ જણાવ્યું કે ઘાયલ બાળકોમાંથી એકની હાલત નાજુક છે. પોલીસને શંકા છે કે વિસ્ફોટક 2 ઇંચનો મોર્ટાર શેલ હતો, જે આ વિસ્તારમાં અગાઉ કુકી-મેઇટી સંઘર્ષ દરમિયાન ફાયર કરવામાં આવ્યો હોઈ શકે છે.
દરમિયાન, શનિવારે ઇમ્ફાલ પૂર્વ જિલ્લાના હેંગંગ પોલીસ સ્ટેશન વિસ્તાર હેઠળ લુવાંગશાંગબમ ખાતે લિબરલ કોલેજના ગેટ પાસે એક હેન્ડ ગ્રેનેડ મળી આવ્યો હતો. મણિપુર પોલીસની બોમ્બ ડિસ્પોઝલ સ્કવોડે સુરક્ષિત રીતે ગ્રેનેડનો કબજો મેળવ્યો અને માર્જિંગ મામંગ ચિંગોલ ખાતે નિયંત્રિત વિસ્ફોટ દ્વારા તેનો નાશ કર્યો.
હાલમાં કોઈ સંગઠને ગ્રેનેડ રાખવાની જવાબદારી લીધી નથી અને તેની પાછળનો હેતુ પણ સ્પષ્ટ નથી.
બીજી ઘટનામાં, સેકમાઈ પોલીસ સ્ટેશન વિસ્તાર હેઠળના ખમરન ગામમાં સ્થિત મૈબામ ચોંજોન સિંઘ સ્ટોન ક્રશરમાં ખોદકામ દરમિયાન એક પેરા શેલ બોમ્બ મળી આવ્યો હતો. આ પછી, મણિપુર પોલીસની બોમ્બ ડિસ્પોઝલ સ્ક્વોડે વિસ્ફોટકને નિષ્ક્રિય કર્યો અને તેન્ડોંગયાન મહારાબી લ્યુક્સમાં તેને સુરક્ષિત રીતે વિસ્ફોટ કર્યો.
દરમિયાન, સુરક્ષા દળોએ ઈમ્ફાલ પૂર્વ જિલ્લાના ખેરગાવ યુમ-ખૈબામ લીકાઈની રહેવાસી ત્રણ મહિલા ડ્રગ સ્મગલરની ધરપકડ કરી છે.
ધરપકડ કરાયેલી મહિલાઓમાં સૈયદ નેઝિયા સુલતાન ઉર્ફે અબેમા (38)નો સમાવેશ થાય છે, જેમની પાસેથી 12 બોરની ડબલ બેરલ બંદૂક, આશરે 140 ગ્રામ હેરોઈનના 12 સાબુ જેવા પેકેટ અને 70,410 રૂપિયા રોકડ મળી આવી હતી.
બીજા આરોપી યુમખાઈબામ સોનિયા (23) પાસેથી આશરે 60 ગ્રામ હેરોઈન અને અત્યંત વ્યસનકારક મેથામ્ફેટામાઈન (યાબા)ની લગભગ 43 ગ્રામની ગોળીઓ ધરાવતી 37 શીશીઓ મળી આવી હતી.
ત્રીજા આરોપી ખુલકફામ ફરઝીના ઉર્ફે જીના (33) પાસેથી સ્પાસ્મો-પ્રોક્સીવોનની 112 કેપ્સ્યુલ જપ્ત કરવામાં આવી હતી.
–IANS
ડીએસસી
