ભાવનગર, 02 માર્ચ, 2026: 36.32 crores collected from customers in PGVCL drive in Bhavnagar circle ગુજરાત સરકારની માલીકીની પશ્વિમ ગુજરાત વીજ કંપની લિમિટેડ (PGVCL) દ્વારા સૌરાષ્ટ્રભરમાં બાકી વીજળી બિલોની વસુલાત માટે ડીસકનેક્શન ઝૂંબેશ હાથ ધરવામાં આવી હતી. જેમાં ભાવનગર સર્કલમાં 1.25 લાખ ગ્રાહકો પાસેથી રૂ.36.32 કરોડ વસુલાયા છે. ઉપરાંત વીજળીનું બિલ નહીં ભરનારા 6270 વીજ જોડાણ કાપી નાખવામાં આવ્યા હતા.
ભાવનગર જિલ્લામાં PGVCL દ્વારા વીજળી બિલના બાકી લેણાંની વસુલાત માટે વીજ કનેકશનો કાપવાની ઝૂંબેશ હાથ ધરવામાં આવી છે. ચાલુ નાણાકીય વર્ષ-2025/2026ના અંતે વીજળીના બાકી બિલો વસુલવાની કામગીરીનો ધમધમાટ ચાલી રહ્યો છે.PGVCL ભાવનગર સર્કલ નીચેના કાર્યક્ષેત્રમાં ફેબ્રુઆરી મહિનામાં મેગા ડિસકનેક્શન ડ્રાઈવ સહિતની કામગીરીથી PGVCLના 1.25 લાખ ગ્રાહકો પાસેથી રૂ.36.32 કરોડ વસુલાયા છે. જેમાં ખાસ કરીને ભાવનગર જિલ્લામાં વીજળીનું બિલ નહીં ભરનારા 6270 વીજ જોડાણ કાપી નાખવામાં આવ્યા હતા.
PGVCLના સૂત્રોના જણાવ્યા મુજબ ભાવનગર સર્કલમાં છેલ્લા 28 દિવસની કાર્યવાહીમાં ફેબ્રુઆરી-2026 મહિનામાં 10957 કર્મચારીઓને કામે લગાડી કલેક્શન અને ડિસકનેક્શન ડ્રાઈવ યોજવામાં આવી હતી. જેમાં વીજળીના બાકી બિલના કુલ રૂ.4.55 કરોડની રકમ નહીં ભરનારા 6270 ગ્રાહકોના જોડાણો કાપી નંખાયા હતા. જ્યારે કલેક્શન અને ડિસકનેક્શન ડ્રાઈવમાં ગત જાન્યુઆરી-2026 મહિનામાં 58 હજાર ગ્રાહકો સામે કડક કાર્યવાહી કરી કુલ રૂ.23.56 કરોડની બાકી લ્હેણી રકમની વસુલાત કરાઈ હતી. જાન્યુઆરી મહિનાની સરખામણીએ ચાલુ ફેબ્રુઆરી મહિનામાં કલેક્શન અને ડિસકનેક્શન ડ્રાઈવ તેજ બનાવી દેવામાં આવી હતી. જેમાં ભાવનગર શહેરી વિસ્તારના 11 અને ગ્રામ્ય વિસ્તારના 21 સબ ડિવિઝનોમાં કુલ 5478 ટીમોના જંગી કાફલા સાથે કલેક્શન અને ડિસકનેક્શન ડ્રાઈવની કામગીરી કરવામાં આવી હતી. ચાર જિલ્લામાં બાકી બિલના રૂ.14.39 કરોડની રકમ સામે રૂ.13.05 કરોડની આવક થઈ છે.
