તિરુવનંતપુરમ, 30 ડિસેમ્બર (IANS). ભારતીય મહિલા ક્રિકેટ ટીમની કેપ્ટન હરમનપ્રીત કૌર T20 ફોર્મેટમાં સૌથી વધુ ‘પ્લેયર ઓફ ધ મેચ’નો ખિતાબ જીતનારી ટોચની ભારતીય બની ગઈ છે. તેણે મિતાલી રાજની બરાબરી કરી. બંને ખેલાડીઓએ અત્યાર સુધી 12-12 વખત આ સિદ્ધિ મેળવી છે.
ભારતીય મહિલા ખેલાડીઓની આ યાદીમાં શેફાલી વર્મા (8) અને સ્મૃતિ મંધાના (8) સંયુક્ત રીતે બીજા સ્થાને છે.
ગ્રીનફિલ્ડ ઇન્ટરનેશનલ સ્ટેડિયમમાં શ્રીલંકા સામે રમાયેલી પાંચમી T20 મેચમાં હરમનપ્રીત કૌરે 43 બોલનો સામનો કરીને 68 રન બનાવ્યા હતા. આ દરમિયાન તેની ઇનિંગમાં 1 સિક્સ અને 9 ફોરનો સમાવેશ થાય છે.
હરમનપ્રીત કૌરે અમનજોત કૌર સાથે એવા સમયે 61 રનની ભાગીદારી કરી જ્યારે ભારતીય ટીમ 77ના સ્કોર સુધી 5 વિકેટ ગુમાવી ચૂકી હતી.
બીજી તરફ, આ સિરીઝની 5 મેચમાં 80.33ની એવરેજથી સૌથી વધુ 241 રન બનાવનાર શેફાલી વર્માને ‘પ્લેયર ઓફ ધ સિરીઝ’ તરીકે પસંદ કરવામાં આવી હતી. આ ત્રીજી વખત હતો જ્યારે 21 વર્ષીય ખેલાડીને આ ખિતાબ મળ્યો હતો. આ સાથે શેફાલી સૌથી વધુ ‘પ્લેયર ઓફ ધ સિરીઝ’ ટાઇટલ જીતવાની બાબતમાં સંયુક્ત રીતે નંબર-1 ભારતીય બની ગઈ છે.
શેફાલી ઉપરાંત મિતાલી રાજ, હરમનપ્રીત કૌર અને દીપ્તિ શર્માને 3-3 વખત આ ખિતાબ મળ્યો છે.
મેચની વાત કરીએ તો ભારતે 20 ઓવરમાં 7 વિકેટ ગુમાવીને 175 રન બનાવ્યા હતા. ભારત તરફથી કેપ્ટન હરમનપ્રીત કૌરે સૌથી વધુ 68 રનની ઇનિંગ રમી હતી જ્યારે અમનજોર કૌરે 21 રન અને અરુંધતિ રેડ્ડીએ અણનમ 27 રન બનાવ્યા હતા.
જવાબમાં શ્રીલંકાની ટીમ નિર્ધારિત ઓવરમાં 7 વિકેટ ગુમાવીને 160 રન જ બનાવી શકી હતી. આ ટીમ માટે ઓપનર હસીની પરેરાએ 65 રન બનાવ્યા જ્યારે ઈમિષા દુલાનીએ 50 રનની ઇનિંગ રમી. આ મેચ 15 રને જીતીને ભારતે સીરિઝ 5-0થી ક્લીન સ્વીપ કરી લીધી હતી.
–IANS
આરએસજી
