દુબઈ એર શોમાં ક્રેશ થયેલા તેજસ એરક્રાફ્ટે દુર્ઘટનાના બે દિવસ પહેલા જ તેની અદભૂત એરોબેટીક્સથી સૌનું ધ્યાન ખેંચ્યું હતું. તેજસ એરક્રાફ્ટનો બે દિવસ જૂનો વીડિયો પણ સામે આવ્યો છે, જેમાં એરક્રાફ્ટ અલગ-અલગ સ્ટંટ કરતા જોવા મળે છે. આ એક મિનિટ છ સેકન્ડના વીડિયોમાં તેજસ વિમાન આકાશમાં અલગ-અલગ સ્ટંટ કરતા જોઈ શકાય છે. શુક્રવારે પણ તેજસ વિમાને આવો જ સ્ટંટ કરવા માટે ઉડાન ભરી હતી, પરંતુ અચાનક કંઈક ખોટું થયું અને વિમાન ક્રેશ થયું અને જમીન પર પડ્યું. અકસ્માત બપોરે 2:10 વાગ્યે (સ્થાનિક સમય) અને બપોરે 3:49 વાગ્યે (ભારતીય સમય અનુસાર) થયો હતો. અકસ્માતનો એક વીડિયો પણ સામે આવ્યો છે. આમાં તેજસ એરક્રાફ્ટ એરોબેટિક્સ કરતા જોવા મળે છે, પછી અચાનક નીચે પડી જાય છે અને જમીન પર પટકાતા જ આગ પકડી લે છે. પાયલોટનું પણ મોત થયું હતું.
તેજસ એરક્રાફ્ટ હિન્દુસ્તાન એરોનોટિક્સ લિમિટેડ બનાવે છે
તેજસ એરક્રાફ્ટ ભારતમાં હિન્દુસ્તાન એરોનોટિક્સ લિમિટેડ દ્વારા બનાવવામાં આવે છે. આ હળવા કોમ્બેટ એરક્રાફ્ટને આત્મનિર્ભર ભારત પહેલ હેઠળ બનાવવામાં આવ્યું છે. માત્ર બે અઠવાડિયા પહેલા, HAL એ તેજસ માટે 113 જેટ એન્જિન ખરીદવા માટે યુએસ ડિફેન્સ કંપની GE એરોસ્પેસ સાથે એક વિશાળ કરાર પર હસ્તાક્ષર કર્યા હતા. તેજસ એ સિંગલ-એન્જિન, મલ્ટી-રોલ ફાઇટર એરક્રાફ્ટ છે જે હાઇ-થ્રેટ એરિયલ ઓપરેશન્સ માટે ડિઝાઇન કરવામાં આવ્યું છે. તે એર ડિફેન્સ, મેરીટાઇમ રિકોનિસન્સ અને સ્ટ્રાઈક જેવા મિશન કરવા સક્ષમ છે.
હાલમાં, એરફોર્સ પાસે 31 સ્ક્વોડ્રન છે, જ્યારે તેની અધિકૃત સંખ્યા 42 છે. ફેબ્રુઆરી 2021માં, સંરક્ષણ મંત્રાલયે 83 તેજસ Mk-1A એરક્રાફ્ટ ખરીદવા HAL સાથે ₹48,000 કરોડના કરાર પર હસ્તાક્ષર કર્યા હતા. જોકે, જીઇ એરોસ્પેસ દ્વારા એન્જિન સપ્લાયમાં વિલંબને કારણે આ એરક્રાફ્ટની ડિલિવરીમાં અવરોધ ઊભો થયો છે.
