થરાદ,18 ફેબ્રુઆરી 2026: વાવ-થરાદ જિલ્લામાં પિલુડા અને કરબૂણ ગામ વચ્ચે રોડ પર દારૂ ભરેલી ક્રેટાકાર પૂરઝડપે બાવળ સાથે ધડાકાભેર અથડાતાં કારમાં સવાર બે લોકોનાં ઘટનાસ્થળે જ મોત નીપજ્યાં હતા. આ બનાવથી આજુબાજુના સ્થાનિક લોકો દોડી આવ્યા હતા. અને અકસ્માતના બનાવની પોલીસને જાણ કરવામાં આવી હતી. અકસ્માતને પગલે ટ્રાફિક જામની સ્થિતિ સર્જાઈ હતી.
આ અકસ્માતના બનાવની વિગત એવી છે કે, આજે વહેલી સવારે એક સફેદ રંગની ક્રેટા કાર પૂરઝડપે પસાર થઈ રહી હતી. ત્યારે કારના ચાલકે સ્ટીયરિંગ પરથી કાબૂ ગુમાવતાં કાર રોડ નીચે ઊતરીને પલટી ખાઈને બાવળના ઝાડ સાથે અથડાઈ હતી. અકસ્માત એટલો ભયાનક હતો કે કારનું પડીકું વળી ગયું હતું. કારમાં દારૂ ભરેલો હોવાથી કારચાલક પૂરપાટ ઝડપે જઈ રહ્યો હતો. આ દરમિયાન સ્ટીયરિંગ પરથી કાબૂ ગુમાવતા તેની કાર બેકાબૂ થઇને રોડની સાઈડમાં ઊતરી પડી હતી. આ ગમખ્વાર અકસ્માતમાં કારમાં સવાર બે લોકો ઘટનાસ્થળે જ મોત નિપજ્યા હતા. પોલીસે ઘટનાસ્થળે પહોંચી દારૂ કબજે કરીને વધુ તપાસ હાથ ધરી છે.
અકસ્માતના સ્થળે દોડી ગયેલા સ્થાનિક લોકોના કહેવા મુજબ અકસ્માત બાદ કારમાંથી દારૂની બોટલો બહાર વેરાઈ ગઈ હતી. આખી કાર દારૂના જથ્થાથી ભરેલી હતી. અકસ્માત એટલો વિકરાળ હતો કે કારમાં ફસાયેલા મૃતદેહોને બહાર કાઢવા માટે ભારે જહેમત ઉઠાવવી પડી હતી. કારને બહાર લાવવા માટે ટ્રેક્ટરની મદદ લેવામાં આવી હતી.
