અમદાવાદ, 1 માર્ચ 2026: old man lost 5.55 lakhs after falling into the trap of a fraudster લોકોને ઠગવા માટે ગઠિયાઓ અવનવી તરકીબો અપનાવતા હોય છે. આજે સોશિયલ મીડિયા અને ડિજિટલના યુગમાં દરેક પગલે સાવધાન રહેવું જરૂરી બન્યું છે. અમદાવાદ શહેરમાં જુના વાડજમાં રહેતા એક સિનિયર સિનિઝનને મોબાઈલ પર ફોન કરીને તમારા બેન્ક ખાતામાં ભુલથી રૂપિયા જમા થયા છે. અને પરત આપવા આજીજી કરીને બેન્કનો રૂપિયા ટ્રાન્સફર થયાનો ખોટો મેસેજ મોકલીને ગુગલ પર પેમેન્ટ રિકવેસ્ટ મોકલીને ગઠિયાએ રૂપિયા કૂલ 5,55,976 રૂપિયા પડાવી લીધા બાદ ફોન સ્વીચઓફ કરી દીધો હતો. આ અંગે સાયબર ક્રાઈમ પોલીસ સ્ટેશનમાં ફરિયાદ નોંધાવતા પોલીસે વધુ તપાસ હાથ ધરી છે.
અમદાવાદમાં સાયબર ગઠિયાઓ દરરોજ નવી મોડસ ઓપરેન્ડી અપનાવી નિર્દોષ નાગરિકોને શિકાર બનાવતા હોય છે. શહેરના જૂના વાડજ વિસ્તારમાં રહેતા 75 વર્ષીય વૃદ્ધ સાથે ‘ઇમોશનલ બ્લેકમેઇલ’ કરી લાખોની ઠગાઈ થઈ હોવાનો કિસ્સો પ્રકાશમાં આવ્યો છે. ઠગ ટોળકીએ રડતા-રડતા ફોન કરી વૃદ્ધની દયા જીતી લીધી અને કૂલ 5,55,976 રૂપિયા પડાવી લીધા હતા.
આ બનાવની વિગત એવી છે કે, શહેરના જૂના વાડજમાં રહેતા લાલજીભાઈ જાદવને ગત 10મી ફેબ્રુઆરીએ ‘મોહન’ નામના શખસનો ફોન આવ્યો હતો. મોહને રડતા અવાજે કહ્યું કે, ‘મારાથી ભૂલથી ક્લોઝ પેમેન્ટની રકમ તમારા ખાતામાં જમા થઈ ગઈ છે. મારા બનેવી આશિષભાઈ તમને ફોન કરશે, પ્લીઝ તેમને પૈસા પાછા આપી દેજો.’ ગઠિયાઓએ લાલજીભાઈને ફસાવવા માટે ખૂબ જ આયોજનબદ્ધ રીતે જાળ બિછાવી હતી. ફોન કર્યા બાદ ઠગે લાલજીભાઈને મોબાઈલ પર ટેક્સ્ટ મેસેજ મોકલ્યા, જેમાં 45,000 અને 50,500 રૂપિયા જમા થયા હોવાનું ખોટું લખાણ હતું. આશિષ નામના બીજા ઠગે ફોન કરી ગૂગલ પે પર પેમેન્ટ રિક્વેસ્ટ મોકલી. વૃદ્ધે સમજ્યા વગર રિક્વેસ્ટ એક્સેપ્ટ કરી, જેનાથી પૈસા તેમના ખાતામાં આવવાને બદલે ઠગના ખાતામાં જવા લાગ્યા. 10મીથી 15મી ફેબ્રુઆરી દરમિયાન અલગ-અલગ બહાને કુલ 5,55,976 રૂપિયા ઓનલાઇન ટ્રાન્સફર કરાવી લીધા હતા.
જ્યારે લાલજીભાઈને શંકા ગઈ અને તેમણે બેન્ક સ્ટેટમેન્ટ ચેક કર્યું, ત્યારે તેમના હોશ ઊડી ગયા. ખાતામાં કોઈ રકમ જમા થઈ જ નહોતી, ઉલટાનું તેમના ખાતામાંથી સાડા પાંચ લાખથી વધુ રકમ ઉપડી ગઈ હતી. ત્યારબાદ બંને ઠગના ફોન સ્વીચ ઓફ આવવા લાગ્યા હતા. અંતે, લાલજીભાઈએ સાયબર ક્રાઈમ પોલીસ સ્ટેશનમાં ફરિયાદ નોંધાવી છે.
