(અલકેશ પટેલ) ગાંધીનગર, 14 ડિસેમ્બર, 2025: Apart from Operation Sindoor, Operation “Indoor” is equally important “ઓપરેશન સિંદૂર આતંકવાદ અને આતંકવાદી સમર્થકો ઉપર નિર્ણાયક પ્રહાર હતો તેમાં કોઈ શંકા નથી. અગાઉ થયેલા આતંકી હુમલા સમયે ભારતનું વલણ અને હવેના આતંકી હુમલા બાદ બાલાકોટ એરસ્ટ્રાઈક તેમજ ઓપરેશન સિંદૂર (sindoor) એ બદલાયેલા ભારતનું પ્રતિબિંબ છે. પરંતુ તે સાથે ભારતે આંતરિક આતંકી હુમલાને પહોંચી વળવા ઓપરેશન ઈનડોર (indoor) કરવાની પણ આવશ્યકતા છે,” તેમ લેફ્ટનન્ટ જનરલ (નિવૃત્ત) દુષ્યંત સિંહે આજે અહીં જણાવ્યું હતું. તેઓ નવમા ફ્લાઈંગ ઓફિસર પરમ વીર ચક્ર નિર્મલ જીત સિંહ સેખોં વાર્ષિક સ્મૃતિ વ્યાખ્યાનમાં “ઓપરેશન સિંદૂર – ટેકઅવે એન્ડ વે ફોરવર્ડ” વિષય ઉપર બોલી રહ્યા હતા. ઓપરેશન ઈન-ડોર શબ્દપ્રયોગ દ્વારા લેફ્ટનન્ટ જનરલ (નિવૃત્ત) દુષ્યંત સિંહે તાજેતરમાં દિલ્હીમાં લાલ કિલ્લા પાસે થયેલા પ્રચંડ બોંબ વિસ્ફોટનો ઉલ્લેખ કરીને દેશની અંદર રહેલા દુશ્મનોને ઓળખવા તરફ ઈશારો કર્યો હતો. તેમણે દેશના તમામ નાગરિકોને પણ ભવિષ્યના સાયબર હુમલાઓ સામે તકેદારી રાખવા તાકીદ કરી હતી.
વાયુસેના સંગઠનની ગુજરાત શાખા દ્વારા આજે 14 ડિસેમ્બરે ગાંધીનગરસ્થિત નીલામ્બર ઓડિટોરિયમ ખાતે 1971ના યુદ્ધમાં દેશની સુરક્ષા માટે સર્વોચ્ચ બલિદાન આપનાર ફ્લાઈંગ ઓફિસર નિર્મલ જીત સિંહ સેખોં PVC વાર્ષિક સ્મૃતિ વ્યાખ્યાનના નવમા સંસ્કરણનું આયોજન કરવામાં આવ્યું હતું. આ સ્મૃતિ વ્યાખ્યાનમાં બે વરિષ્ઠ અનુભવી સંરક્ષણ અધિકારીઓએ ઓપરેશન સિંદૂર પછીની પરિસ્થિતિ અને રાષ્ટ્રીય સુરક્ષા સંબંધિત વ્યૂહાત્મક પાસાઓ પર વિસ્તૃત પ્રકાશ પાડ્યો હતો. આ કાર્યક્રમના મુખ્ય અતિથિ તરીકે એર માર્શલ નગેશ કપૂર ઉપસ્થિત રહ્યા હતા.
યોગાનુયોગ, 54 વર્ષ પહેલાં 14 ડિસેમ્બરના દિવસે જ આપણા દેશના બહાદુર સપૂત ફ્લાઈંગ ઓફિસર નિર્મલ જીત સિંહ સેખોંએ કાશ્મીરમાં પાકિસ્તાની સેનાને આગળ વધતી રોકવા માટે શ્રીનગર એરફિલ્ડનું રક્ષણ કરવા પોતાનું જીવન બલિદાન આપ્યું હતું. આ ઘટનાની સ્મૃતિમાં 2 નવેમ્બર 2025ના રોજ સમગ્ર ભારતમાં 60 થી વધુ સ્થળોએ “સેખોં IAF મરાઠા-2025” યોજવામાં આવ્યું હતું જેને ભારે પ્રતિસાદ મળ્યો હતો.
આ અત્યંત મહત્ત્વના સ્મૃતિ વ્યાખ્યાનમાં એર વાઇસ માર્શલ અનિલ ગોલાની (નિવૃત્ત) દ્વારા “ઓપરેશન સિંદૂર – રિરાઇટિંગ ધ ઇન્ડિયા – પાકિસ્તાન રૂલ બુક” વિષય ઉપર સમગ્ર ઓપરેશન સિંદૂરની વિગતવાર છણાવટ કરી હતી.
