અમદાવાદ, 25 ફેબ્રુઆરી 2026: ગુજરાતમાં અમદાવાદ સહિત શહેરોમાં રોડ અકસ્માતના બનાવો વધતા જાય છે. વાહનચાલકો સરેઆમ ટ્રાફિકના નિયમોનો ભંગ કરી રહ્યા છે. અકસ્માતોને લીધે મૃત્યુનું પ્રમાણ પણ વધી રહ્યું છે. ત્યારે રાજ્યના પોલીસ વડા કે.એલ.એન.રાવના આદેશ બાદ અમદાવાદ સહિત તમામ શહેરોમાં આજે સવારથી વાહનોનું સઘન ચેકિંગ કરીને ટ્રાફિકભંગ કરતા વાહનચાલકો પાશેથી દંડ વસુલવામાં આવી રહ્યા છે.
ગુજરાતમાં અમદાવાદ સહિત તમામ શહેરોમાં તા. 25મી ફેબ્રુઆરીથી 10 માર્ચ સુધી ખાસ ટ્રાફિક ડ્રાઈવનું આયોજન કરવા માટે રાજ્ય પોલીસ વડા કે.એલ.એન.રાવ દ્વારા તમામ પોલીસ કમિશનરો અને જિલ્લા પોલીસ વડાને સૂચના આપવામાં આવી છે. જેથી આજથી ટ્રાફિક પોલીસ અને સ્થાનિક પોલીસની ટીમો રોડ ઉપર ઉતરી ટ્રાફિકના નિયમોના ભંગ કરનારા વાહન ચાલકો સામે કાર્યવાહી કરી રહી છે.
રાજ્ય પોલીસ વડાએ ‘નંબર પ્લેટ વિનાની અને કાળા કાચવાળી ગાડીઓ સામે તેમજ ટ્રાફિકના વિવિધ નિયમો જેવા કે રોંગ સાઈડમાં ડ્રાઇવિંગ, પેસેન્જર વાહનોમાં પરમિટ કરતાં વધુ પેસેન્જરો બેસાડવા, ડ્રીંક એન્ડ ડ્રાઈવ સહિત અલગ અલગ નિયમો બદલ કાર્યવાહી કરવા સુચના આપી છે. અમદાવાગદ શહેરમાં આજે સવારથી વિવિધ વિસ્તારોમાં ટ્રાફિક ઝૂંબેશ શરૂ કરવામાં આવી છે. હેલ્મેટ વિના ઘણબધા બાઈકચાલકો પકડાયા છે. તેમજ કારના કાચ પર બ્લેકફિલ્મ, ચાલુ વાહને મોબાઈલફોન પર વાન કરવી, અને સીસીટીવીમાં ન પકડાય તે માટે વાહનની નંબર પ્લેટ વાળી દેવી જેવા ટ્રાફિક ભંગના ગુનામાં વાહનચાલકોને દંડ ફટકારવામાં આવી રહ્યો છે.
સૂત્રોના કહેવા મુજબ ટ્રાફિક નિયમના ભંગ બદલ કાનુની કાર્યવાહી કરવા સમયાંતરે ખાસ ટ્રાફિક ડ્રાઇવનું આયોજન શહેર/જિલ્લાઓ ખાતે કરવામાં આવે છે તેમ છતાં માર્ગ અકસ્માતોની સંખ્યામાં ગતવર્ષની સરખામણીએ આ વર્ષે વધારો થયો છે, શહેર અને જિલ્લામાં પોલીસ દ્વારા કરવામાં આવેલી ડ્રાઇવ દરમિયાન રોજે-રોજ કરેલી કામગીરીની વિગતો નિયત પત્રકમાં તારીખ વાઇઝ તૈયાર કરી રાજ્ય પોલીસ વડાની કચેરીને ઇ-મેઇલથી મોકલી આપવાની પણ સુચના આપવામાં આવી છે.
