અમદાવાદ.18 ફેબ્રુઆરી 2026: શહેરના રિવરફ્રન્ટ (પશ્વિમ)ના રોડ પર એએમટીએસ બસ શરૂ કરવાનો નિર્ણય લેવામાં આવ્યો છે. આશ્રમ રોડને બદલે રિવરફ્રન્ટના રોડ પર ડબલ ડેકર એએમટીએસની બસ ટ્રાયલરૂપે ચલાવાતા ગાંધી બ્રિજ નીચે ડબલ ડેકર બસ ફસાઈ હતી. બ્રિજના ગર્ડર અને બસ વચ્ચે એક ફુટ જેટલું જ અંતર રહ્યું હતું તેથી બસચાલક પણ ગભરાઈ ગયો હતો. અને બ્રિજ નીચેથી ડબલ ડેકર બસ માંડ માંડ નિકળી શકી હતી.
અમદાવાદના સાબરમતી રિવરફ્રન્ટ પશ્ચિમ તરફના રોડ પર ડબલ ડેકર એએમટીએસ બસ શરૂ કરવાનો નિર્ણય લેવામાં આવ્યો છે. જેમાં આજે 18 ફેબ્રુઆરીએ રિવરફ્રન્ટ ગાંધી બ્રિજ નીચે ડબલ ડેકર બસ ફસાઈ ગઈ હતી, ડબલ ડેકર બસના ચાલકના ઘણા પ્રયત્નો બાદ માંડ માંડ બસ નીકળી હતી. બ્રિજના ભાગને અડવામાં માત્ર એક ફૂટની જગ્યા રહી જાય તેવી સ્થિતિ જોવા મળી હતી. ડબલ ડેકર બસની ઊંચાઈ વધુ છે અને રિવરફ્રન્ટ રોડની ઉપર ચાર જેટલા બ્રિજ આવેલા છે. જે બ્રિજના ભાગને અડી જાય તેવી સ્થિતિમાં છે ત્યારે આ બસના રૂટને તપાસવામાં આવી રહ્યા છે અને બે બસ શરૂ પણ કરી દેવામાં આવી હોવાનું જાણવા મળ્યું છે
અમદાવાદ મ્યુનિસિપલ ટ્રાન્સપોર્ટ સર્વિસ સંચાલિત બસો શહેરમાં દોડી રહી છે. શહેરના ટુરીઝમ સ્થળો અને ફરવા લાયક સ્થળોએ જવા માટે લોકો વધુ પ્રેરાય તેના માટે મ્યુનિસિપલ કમિશનર દ્વારા સાબરમતી રિવરફ્રન્ટમાં ડબલ ડેકર બસ શરૂ કરવા માટે અધિકારીઓને સૂચના આપી હતી. જેના પગલે મ્યુનિસિપલ ટ્રાન્સપોર્ટ સર્વિસ દ્વારા ડબલ ડેકર એસી બસ સાબરમતી રિવરફ્રન્ટમાં શરૂ કરવામાં આવી છે. જોકે આ બસ બ્રિજની નીચેથી પસાર થાય ત્યારે તેની ઊંચાઈ હોવાના કારણે ઉપરના ભાગમાં માત્ર એક ફૂટ જેટલી જગ્યા રહે છે, જેના કારણે અકસ્માત થવાની સંભાવના છે. બસ ધીમી ચાલતી હોવાથી અને બ્રિજની નીચે જો ધીમે ચલાવવામાં આવે તો પાછળ આવતા વાહનોમાં ટ્રાફિકજામ થાય તેવી પણ સ્થિતિ છે.
એએમટીએસ કમિટીના ચેરમેન ધરમશી દેસાઈએ જણાવ્યું હતું કે, સાબરમતી રિવરફ્રન્ટમાં ડબલ ડેકર એસી બસ ચલાવવા માટેનું અત્યારે ટેસ્ટિંગ કરવામાં આવી રહ્યું છે. બ્રિજની નીચે નડતરરૂપ થાય છે કે કેમ તે અંગે તપાસ કરી અને ત્યારબાદ ચલાવવા માટે નિર્ણય કરીશું હાલ પૂરતું ચેકિંગ કરવામાં આવી રહ્યું છે.
